Үүтү бэлэмнээһини өйүүргэ 2025 сылга Саха Сиригэр 4,3 млрд солк. суумалаах субвенция көрүлүннэ. Балаҕан ыйын 22 күнүгэр муниципальнай тэриллиилэр 2,6 млрд солк. ыллылар, бу уопсай сууматтан 61% буолар. Бу үп-харчы тыа хаһаайыстыбатын табаары оҥорооччуларыгар толору тиэрдилиннилэр. Бу туһунан өрөспүүбүлүкэ бырабыыталыстыбатын бэрэссэдээтэлин солбуйааччы Сергей Местников иһитиннэрдэ.
Бэрэссэдээтэл солбуйааччы бэлиэтээбитинэн, регион тыа хаһаайыстыбатын уонна ас-үөл бэлиитикэтин министиэристибэтэ өрөспүүбүлүкэ үбүн министиэристибэтин кытта хаалбыт сууманы муниципальнай тэриллиилэргэ тиэрдиигэ үлэни ыытар.
«Үүтү бэлэмнээһин урукку сыллардааҕар үчүгэй динамиканы көрдөрөр. Балаҕан ыйын 18 күнүнээҕи туругунан 52 тыһыынча туонна үүт бэлэмнэннэ, ити 62,8 тыһыынчанан туонна кээмэйдээх бигэргэтиллибит сыллааҕы былаан 82,8% буолар. Бу 2024 сыллааҕы туһааннаах кэмҥэ 47,9 тыһыынча туонна үүтү бэлэмнээһиҥҥэ көрдөрүүнү куоһарар», — диэтэ Сергей Местников.
Муниципальнай тэриллиилэр ортолоругар Мэҥэ Хаҥалас улууһа (былаан 98%), Чурапчы улууһа (92%) уонна Горнай улууһа (88%) бастыҥ көрдөрүүлээхтэр. Амма, Сунтаар, Кэбээйи көрдөрүүлэрэ үрдүк, Өлүөхүмэ, Томпо, Бүлүү уонна Хаҥалас улуустарыгар эмиэ үлэ үчүгэй.
Санатар буоллахха, 2025 сылтан муниципальнай оройуоннар дьаһалталара тыа хаһаайыстыбатын сайыннарыы бэлиитикэтин өйөөһүн 15 хайысхатынан бэйэлэрэ быһаараллар, ол иһигэр субсидияны ылааччылар ставкаларын уонна категорияларын быһаарыы, тыа хаһаайыстыбатын кыра эбийиэктэрин, ол иһигэр 100 төбөҕө тиийэр ынах хотоннорун тутуу.
This post was published on 23.09.2025 10:26 10:26