Саха сиригэр 15 тыһыынча кэриҥэ киһи гепатит ыарыынан ыалдьан диспансернай учуокка турар. Ордук тарҕаммыт гепатиттарынан В уонна С буолар, бу көрүҥүнэн 13 тыһыынча кэриҥэ киһи ыалдьар. Бу туһунан өрөспүүбүлүкэ доруобуйа харыстабылын министиэристибэтин кылаабынай инфекциониһа Снежана Слепцова социальнай ситимҥэ аһаҕас эфиргэ кэмигэр иһитиннэрдэ.
«Хроническай гепатитынан хаан уонна киһи этин убаҕаһын нөҥүө сутуллаллар. Хас биирдии көрүҥ туһунан эмтэнэр. Холобур, С гепатит уон сыл анараа өттүгэр эмтэммэт этэ. Билигин икки-үс ый устата холкутук эмтэнэр. Бэл, маннык курс кэнниттэн эмтэммит дьахтар доруобай оҕону төрөтүөн сөп», — диэн быраас бэлиэтээтэ.
