11 культура үлэһитэ Саха сиригэр «Земский работник культуры» бырагыраама кыайыылаахтарынан буолла. Кинилэр икки мөлүйүөн солкуобай суумалаах биирдиилээн төлөбүрү ылан, тыа сирин уонна кыра куораттар культураларын тэрилтэлэригэр үлэлии барыахтара, диэн ЯСИА иһитиннэрэр.
Культураҕа уонна духуобунай сайдыыга миниистир Афанасий Ноев оҕо искусствотын оскуолаларын улэтэ үүнэр көлүөнэни иитиигэ суолталааҕын тоһоҕолоон бэлиэтээтэ уонна эттэ: “«Земский работник культуры» бырагыраамаҕа талыы уонна үлэҕэ киирии тиһигэ “госуслуги” судаарыстыбаннай систиэмэҕэ интеграцияланыаҕа. Саха сирэ бу процеһы апробациялааһыҥҥа уонна цифровизациялааһыҥҥа пилотнай регион буолуоҕа”.
Кыайыылаахтар ортолоругар — Светлана Винокурова, Дьааҥы оройуонун культуратын дьиэтигэр уус-уран салайааччынан үлэлиэҕэ. Кини бэлиэтээбитинэн, хотугу кыраай эбээн тылын уонна культуратын дириҥник үөрэтэригэр кыаҕы биэриэҕэ.
Бырагыраама өссө биир кыттыылааҕа, музыка Үрдүкү оскуолатын бүтэрбит Робелла Артемьева Ньурба улууһун Маалыкай сэлиэнньэтигэр оҕолору үөрэтиэҕэ. Кини Ньурбатааҕы искусство оскуолатын филиалыгар фортепиано преподавателэ уонна музыкальнай салайааччы буолуоҕа.
Санатан эттэххэ, Россия култууратын министиэристибэтэ көҕүлээбит «Земский работник культуры» бырагыраамата тыа сиригэр, оробуочай бөһүөлэктэргэ, куорат тииптээх бөһүөлэктэргэ уонна 50 тыһыынчаҕа тиийэ нэһилиэнньэлээх кыра куораттарга үлэлииргэ бэлэм исписэлиистэри өйүүргэ туһуламмыт.
