РФ бырабыыталыстыбата Уһук Илин уонна Киин федеральнай уокуруктар регионнарыгар «Земский тренер» бырагырааманы олоххо киллэриигэ субсидиялары түҥэттэ. 90,6 мөл. солк. суумалаах үп 26 региоҥҥа ыытыллыаҕа. Саха сирэ 5 мөл.640 тыһыынча солкуобайы ылыаҕа.
Бырабыыталыстыба бэрэссэдээтэлэ Михаил Мишустин Уһук Илин уонна Киин федеральнай уокуруктар регионнарыгар 2025 сылга президент сорудаҕынан саҕаламмыт «Земский тренер» бырагырааманы олоххо киллэриигэ субсидияны үллэрии туһунан дьаһалга илии баттаата.
90,6 мөл. солк. суумалаах үп 26 региоҥҥа ыытыллыаҕа, олор 2025 сылга субсидияны биэрэргэ сайаапка түһэрбиттэр. Ити Бурятия уонна Саха Өрөспүүбүлүкэлэрэ, Забайкальскай, Камчатскай, Приморскай уонна Хабаровскай кыраай, Амур, Белгород, Брянскай, Владимирскай, Воронежскай, Ивановскай, Калуга, Кострома, Курскай, Липецкай, Москва, Орловскай, Рязань, Смоленскай, Тамбов, Тверь, Тула, Ярославскай уонна Еврейскай автономнай уобаластар, ону тэҥэ Чукотскай автономнай уокурук. Сыл бүтүөр диэри бу субъектарга 80-ча исписэлииһи үлэҕэ ыларга былааннанар.
Бырагыраама чэрчитинэн 50 тыһыынчаҕа диэри киһилээх нэһилиэнньэлээх пууннарга үлэҕэ кэлбит физкультура уонна спорт эйгэтин үлэһиттэрэ биир кэмнээх компенсационнай төлөбүрдэри ылыахтара. Нэһилиэнньэлээх пууннар Уһук Илин сиригэр-уотугар баар буоллахтарына, биир кэмнээх төлөбүр кээмэйэ 2 мөл.солк. буолуоҕа. Атын регионнарга — 1 мөл. солк.
Судаарыстыбаттан үрдүк эбэтэр орто профессиональнай үөрэхтээх исписэлиистэр өйөбүлү ылыахтара. Ол туһугар физическэй культура уонна спорт тэрилтэтин кытта толору үлэ күнүн усулуобуйатыгар үлэ дуогабарын түһэрсиэхтээхтэр, онно биэс сылтан итэҕэһэ суох үлэлииргэ эбээһинэстээхтэр.
Алтынньы 20 күнүгэр вице-премьердары кытта буолбут сүбэ мунньахха ылыллыбыт быһаарыы туһунан этэн туран, Михаил Мишустин квалификациялаах исписэлиистэр кыра нэһилиэнньэлээх пууннар спортивнай тэрилтэлэригэр сылдьаллара уонна оҕолор кинилэр салалталарынан дьарыктаналлара улахан суолталааҕын бэлиэтээтэ.
«Бу кинилэргэ доруобуйаларын бөҕөргөтүүгэ, баҕар, профессиональнай таһымҥа тахсалларыгар, үрдүк ситиһиини спорка көрдөрөллөрүгэр, чемпионнар буолалларыгар көмөлөһүөҕэ», – диэн миниистирдэр кабинеттарын баһылыга эбэн эттэ.
«Земский тренер» бырагырааманы олоххо киллэриигэ туһуламмыт миэрэлэри бырабыыталыстыбаҕа судаарыстыба баһылыга 2024 с. президент иһинэн физкультураны уонна спорду сайыннарыыга Сэбиэт мунньаҕын түмүгүнэн сорудахтаата. 2026 сылтан бырагыраама Россия бары регионнарыгар үлэҕэ киириэҕэ.
