21 Тохсунньу 21.01
  • -48°
  • $ 73,82
  • 83,32

Саха сирэ уонна Красноярскай кыраай интэриэстэрин федеральнай таһымҥа туруорсуохтара

17:35, 01 февраля 2017
Текст:

Тохсунньу 26-30 күннэригэр норуот депутаттара — Ил Түмэн Хонтуруоллуур кэмитиэтин бэрэссэдээтэлэ Александр Уаров, тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Дмитрий Саввин, Иван Андросов, Саха Өрөспүүбүлүкэтин Арктика дьылаларыгар судаарыстыбаннай кэмитиэт бэрэссээдээтэлин бастакы солбуйааччы Иван Павлов, Хатастааҕы сибиинньэ иитэр тэрилтэ салайааччытын солбуйааччы Сергей Шестаков Красноярскай кыраайга үлэлээн кэллилэр.


Сырыы чэрчитинэн тохсунньу 27 күнүгэр Красноярскай кыраай Сокуону таһаарар Мунньаҕын депутаттара Саха Өрөспүүбүлүкэтин Ил Түмэнин делегациятын кытта көрүстүлэр. Бу туһунан Ил Түмэн Хонтуруоллуур сис кэмитиэтин бэрэссэдээтэлэ Александр Уаров маннык кэпсээтэ:

Көрсүһүү тыа сирин дьыалаларыгар уонна агропромышленнай бэлиитикэтигэр сис кэмитиэтин бэрэссэдээтэлэ Сергей Зяблов көҕүлээһининэн, ыҥырыытынан ыытылынна. Көдьүүстээх кэпсэтии тахсарын инниттэн мунньахха элбэх депутат, федеральнай таһымнаах тэрилтэлэр салайааччылара кытыннылар. Ол курдук, депутаттар Валерий Вэнго, Александр Бойченко, Андрей Новак, Красноярскай кыраай Счетнай палаататын бэрэссэдээтэлин солбуйааччы Виктор Астраханцев, тыа хаһаайыстыбатын миниистирин солбуйааччы Сергей Брылев, экологияҕа уонна айылҕа баайыгар миниистири солбуйааччы Владимир Званцев, Красноярскай кыраай урбаанньыттарын уонна промышленниктарын Сойууһун бэрэссэдээтэлэ Михаил Васильев, балыктааһыҥҥа Федеральнай агентствоны салайар Станислав Ильясов уо.д.а. кытыннылар.

Кэпсэтиигэ сүрүннээн балыктааһын уонна аргарнай бэлиитикэ боппуруостарыгар болҕомто уурулунна. Чуолаан, тыа хаһаайыстыбатын сайдыытыгар туһаайыллыбыт анал бырагыраамалар (субсидия) тустарынан, аныгы ньыманы туттууга, табаны иитиигэ уонна балыктааһыҥҥа кэскиллээх этиилэри дьүүллэстибит.

Бэлиэтээн эттэххэ, Красноярскай кыраай тыа хаһаайыстыбатын сайдыытыгар кыраай бюджетыттан 960 мөл. солк. көрөр эбит буоллаҕына, Саха сиригэр бу салааҕа өрөспүүбүлүкэ бюджетыттан 10 млрд 700 мөл. солк. тыырыллар.

Красноярскай кыраай Сокуону таһаарар Мунньаҕын Хотугу төрүт олохтоох аҕыйах ахсааннаах норуоттар боппуруостарыгар сис кэмиэтитин бэрэссэдээтэлин солбуйааччы Валерий Вэнго көрсүһүүгэ тыл этэригэр Саха сиригэр таба иитиитин өйөөһүҥҥэ көдьүүстээх дьаһаллар олоххо киирэллэрин бэлиэтээтэ. Ил Түмэнинэн ылыллыбыт сокуоннары ыаллыы регион дьокутааттара холобур быһыытынан оҥостон, таба иитиитигэр сыһыаннаах анал дьаһаллар тахсалларыгар көмө буолуоҕун туһунан иһитиннэрдэ.

Салгыы Ил Түмэн тыа сиригэр уонна аграрнай бэлиитикэтигэр сис кэмитиэтин бэрэссэдээтэлэ Дмитрий Саввин сырдатта:

Түөрт күн устата биһиги бөлөхпүтүн тыа сирин дьыалаларыгар уонна агропромышленнай бэлиитикэтигэр сис кэмитиэтин бэрэссэдээтэлэ Сергей Зяблов, кини көмөлөһөөччүтэ Вячеслав Панферов арыаллаатылар. Хатастааҕы сибиинньэ иитэр тэрилтэ салайааччытын солбуйааччы Сергей Шестаков Красноярскай кыраай дьокутаатын, бөдөҥ агрохолдинг генеральнай дириэктэрэ Роман Голдьманы кытта дьыалабыай сибээс олохтоото. Инникитин саҥа технологиялары туттууга, үлэни-хамнаһы көдьүүстээхтик ыытыыга үлэ үөрүйэҕин атастаһарга кэпсэттилэр. Биһиги Роман Гольдман хаһаайыстыбата хайдах үлэлиирин көрдүбүт.

Биллэрин курдук, биһиги өрөспүүбүлүкэбит Красноярскай кыраайы кытта Анаабыр улууһунуун быысаһа сытар. Балыктааһыҥҥа, балыгы үөскэтиигэ сыһыаннаах боппуруостары Красноярскай кыраай дьокутааттарын кытта дьүүллэстибит. Манна балыктааһыҥҥа Федеральнай агентство бэрэстэбиитэллэрэ санааларын үллэһиннилэр, бу хайысхаҕа салгыы бииргэ үлэлэһэргэ туһааннаах этиилэр киирдилэр. 

Манна даҕатан эттэххэ, Александр Усс бэрэссэдээтэллээх Красноярскай кыраай парламена билиҥҥитэ 52 дьокутааттаах. 2016 сыл балаҕан ыйын 18 күнүгэр ІІІ ыҥырыылаах мунньахха дьокутааттар саҥа састааптара талыллыбыт эбит. Инньэ гынан, парламент ыаллыы сытар субъектары кытта икки өттүттэн барыстаах дьыалабыай ситими олохтуурга сыал-сорук туруоруммут. Парламент «Красноярскай кыраайга тыа хаһаайыстыбатын сайыннарыы туһунан» сокуону бэлэмнии сылдьар, онон биһигиттэн сүбэ-ама ылара үгүс курдук.

 Бу сырыы түмүгүнэн, Саха сирэ уонна Красноярскай кыраай парламеннара бииргэ үлэлэһэргэ сөбүлэһии түһэрсэргэ этии киирдэ. Ол быһыытынан, сокуон таһаарыытыгар федеральнай таһымҥа өрөспүүбүлүкэ уонна кыраай интэриэстэрин бииргэ туруорсуохтара. 

0
0
21 января 21.01
  • -48°
  • $ 73,82
  • 83,32