Саха сирэ уонна Газпромбанк аан дойдутааҕы сэлии киинин тэрийиигэ бииргэ үлэлиэхтэрэ. ВЭФ -2025 туһааннаах сөбүлэһиигэ өрөспүүбүлүкэ баһылыга Айсен Николаев уонна аахсыйалаах уопсастыба вице-президенэ Алексей Чичканов илии баттаатылар.
Сөбүлэһии чэрчитинэн Саха сиригэр «Аан дойдутааҕы сэлии киинэ» диэн норуоттар икки ардыларынааҕы научнай-туристическай паарканы тэрийэргэ, Арктика палеонтологиятыгар, генетикатыгар уонна климатологиятыгар чинчийиигэ, туристическай уонна үөрэх инфраструктуратын сайыннарыыга ураты былаһаакка буолуоҕа. Бырайыак дойду президенэ Владимир Путин бигэргэппит Дьокуускай куорат маастар-былааныгар киллэриллибит.
Санатан эттэххэ, Киини тэрийэр былаһаакка Табаҕа мыыһыгар буолуоҕа. Концепция быһыытынан, кини научнай-чинчийэр уонна лабораторнай инфраструктураны,ол иһигэр ирбэт тоҥу, биотехнологияны, килиимэти уонна сэлии фаунатын үөрэтэр хайысхалары, мультимедийнай экспозиция уонна имерсивнай киэптэрдээх цифровой музей уонна быыстапка эйгэлэрин, оскуола бырагыраамаларыттан университет стажировкаларыгар, норуоттар икки ардыларынааҕы академическай тректэргэ диэри үөрэх уонна сырдатыы былаһааккаларын холбуоҕа.
Ону тэҥэ манна экспедицияларга уонна кэтээн көрүүгэ айылҕа научнай полигона, туристскай уонна культурнай инфраструктура — «Муус кэм» тематическай паарката, гостиница, гастрокластер, этнографическай дьиэлэр, панорамнай уонна демонстрационнай былаһааккалар, мастарыскыайдар баар буолуохтара.
This post was published on 04.09.2025 17:25 17:25