Спорт уонна культура эйгэтигэр регионнар икки ардыларынааҕы сибээһи кэҥэтии кэскиллэрин Саха сирин правительствотын вице- премьерэ Сергей Местников уонна Башкортостан Курултай государственнай Мунньаҕын вице- спикерэ Тамара Тансыккужинаны кытары кэпсэттилэр, диэн иһитиннэрэр Саха сирин аҕа баһылыгын уонна правительствотын пресс- сулууспата.
Көрсүһүүгэ Россия дуобакка сүүмэрдэммит хамаандатын старшай тренерэ Юрий Черток кытынна. Кэпсэтии кыттыылаахтара спорт таһынан, төрөөбүт тылы харыстааһын уонна сайыннарыы, регионнааҕы киинэ уонна ИТ эйгэлэригэр өйөбүл боппуруостарын таарыйдылар. Башкортостан вице-спикера Саха сиригэр кэлэ сылдьан Ил Түмэҥҥэ уонна республика министерстволарыгар рабочай көрсүһүүлэри ыытыаҕа.
Аатырбыт спортсмен Тамара Тансыккужина балаҕан ыйын 6-8 күннэригэр нуучча уонна сүүс харахтаах дуобакка Россия үтүөлээх тренерэ Николай Кычкин аатынан Бүтүн Россиятааҕы күрэхтэһиигэ кыттар.
Ону таһынан балаҕан ыйын 7 күнүгэр сүүс харахтаах дуобакка Саха сирин историятыгар бастакы, Россияҕа иккис аан дойду чемпиона Матрена Ноговицынаны кытта көрсүһүүгэ тахсыаҕа. НВК «Саха» ханаалыгар быһа эфиргэ 19:00 чаастан тахсыаҕа. Бу туһунан Саха сирин вице- премьерэ Сергей Местников кэпсээтэ.
This post was published on 06.09.2022 11:33 11:33