2023 сылга уонна былаанынан 2024 уонна 2025 сылларга тыа сирин кэлимник сайыннарыыга Саха сирин 14 оройуоннарыгар ол быыһыгар арктическай оройуоннары киллэрэн туран, 30-ча бырайыак ыытыллара былааннанар. Сэтинньи ыйга РФ тыа хаһаайыстыбатын министиэритибэтигэр сүүмэрдээһин ыытыллыаҕа. Бу туһунан өрөспүүбүлүкэ премьерэ Андрей Тарасенко биллэрбитин СИА иһитиннэрэр.
Быйыл бырагырааманан өрөспүүбүлүкэ сэттэ оройуонугар 13 социальнай эбийиэк тутулла турар.
Үөһээ Бүлүү оройуонун Кырыкыйыгар культурнай-спортивнай комплекс оттон Маҥааска оҕо саадын тутуута түмүктэнэн эрэр. Ону тэҥэ, Үөһээ Бүлүү оройуонун киинигэр эмиэ культурнай-спортивнай комплекс тутуллар. Бүлүү улууһун Күбэйиндэтигэр оҕо саадын уонна Уһун нэһилиэгэр оскуола туталлар. Чурапчы оройуонугар Үрүҥ-Күөлүгэр нэһилиэк сайдыытын киинин тутуу салҕанар оттон Туора-Күөлгэ оҕо саадын тутуута. Уус-Алдан оройуонугар быйыл саҥа оскуоланы уонна оҕо саадын үлэҕэ киллэриэхтэрэ, Хаҥалас оройуонун 4-с Малдьаҕар нэһилиэгэр саҥа оскуоланы киллэриэхтэрэ.
Сунтаар оройуонун Күндээйэтигэр оҕо саадын тутуута бүтэрэ кыра хаалла. Маны сэргэ, Сунтаар нэһилиэгэр бассейннаах спортивнай комплекск тутуута графиктан хаалан иһэр, бэдэрээтчиттэри кытта саҥа график оҥоһулунна, тутуу матырыйааллара ыараабыттарынан сибээстээн эбии үп көрүллүөҕэ.
Эрдэ Эдьигээн оройуонун Кыстатыамыгар оскуола-саад тутуутун түмүктээбиттэрэ, оттон Үөһээ Бүлүү оройуонун Хомустаах нэһилиэгэр уулусса сырдатыын оҥорбуттара.
