РФ президенэ Владимир Путин Россия норуоттарын сомоҕолоһууларын сылын аһыллыытын биллэрбитэ. Тэрээһин «Россия — семья семей» марафон чэрчитинэн ыытылынна. Саха сирэ онлайн-эрэһииминэн кытынна, «Патриот» ыччат кииниттэн трансляция ыытылынна, диэн ЯСИА иһитиннэрэр.
«Сомоҕолоһуу — бу биһиги судаарыстыбабыт тутула. Норуоттар уонна дьон сомоҕолоһуулара суох, туруоруммут сыаллары ситиһии уустук буолуо. АБДь-га уопут уопсай дьулуура, сомоҕолоһуута суох кыайыы кыаллыбатын көрдөрдө. Окуопаларга араас омук, итэҕэл диэн суох, онно бары доҕоттор, бырааттар уонна аймахтар. Бу бойобуой дьайыы зонатыгар өйдөнөр уонна бу өйдөбүл эйэлээх олоххо эмиэ баар буолуон баҕарабын. Бу кыаллар кыахтааҕын бэйэм уопуппар өйдөөбүтүм», — диэтэ анал байыаннай дьайыыга кыттыбыт өрөспүүбүлүкэ ыччат дьыалатыгар уонна социальнай коммуникацияҕа миниистирэ Петр Шамаев.
Кини эдэр көлүөнэ дойдуну өссө күүскэ түмэр, хамсатар күүс буолуон сөбүн бэлиэтээтэ.
«Биһиги тэрээһиннэрбит сомоҕолоһуу тиэмэтин таарыйаллар, быйыл ону өссө күүһүрдүөхпүт. «Патриот» ыччат киинин базатыгар уопсастыбаннай тэрилтэлэрбит элбэх тэрээһиннэри ыытарыгар үлэлэһиэхпит», — диэтэ Петр Шамаев.
«Биһиэхэ холбоһор сыаннастар олус элбэхтэр — ыал, оҕо, билии ылыы, сайдыы, көҥүл, экология уо.д. а. Кинилэр биһигини ханнык тылынан саҥарарбытыттан, ханнык таҥараҕа үҥэрбититтэн тутулуга суох түмэллэр. Быйыл тэрээһиннэр элбэхтэр эрээри, ис хоһооно онно буолбатах, ис хоһооно бэйэбитигэр, алдьархай таҕыстаҕына — эйиэхэ ким баҕарар илии биэриэн сөп», — диэтэ Бүтүн Россиятааҕы Народнай Фронт хос бэрэстээтэлэ Иван Луцкан.
Кини санаатыгар, Россия норуотун култуурнай куода көмө оҥорорго бэлэм буолар. «Бу боростуой кырдьыктары эдэр көлүөнэҕэ тиэрдиэхтээхпит, кинилэр ону харыстаан, оҕолоругар биэриэхтээхтэр. Оччотугар дойдубут кытаанах, күүстээх, кыайтарбат буолуоҕа», — диэн эбэн биэрдэ кини.
Үөрүүлээх сиэр-туом Москваҕа «Россия» национальнай кииҥҥэ ыытылынна. Онно дойду бары регионнарын бэрэстэбиитэллэрэ — түөрт тыһыынчаттан тахса киһи кыттыыны ылла. Саха сириттэн тэрээһиҥҥэ Россия Геройа Андрей Григорьев, Россия норуоттарын Ассамблеятын региональнай салаатын бэрэстээтэлэ Афанасий Владимиров уонна Саха сирин норуоттарын ыччат Ассамблеятын көхтөөх дьоно сырыттылар.
«Билии» уопсастыба тэрийбит « Россия — семья семей » сырдатар марафона норуоттар сомоҕолоһууларын, үгэстэр утумнарын уонна РФ гражданнарын биир сомоҕолоһууларын көрдөрөр соруктаах. Болҕомто киинигэр — сүүһүнэн омуктар биир ыал буолан олорор Россия судаарыстыба быһыытынан уратыта.
