Саха сирэ коммунальнай инфраструктура эбийиэктэрин тутууга уонна саҥардыыга 759 мөл.солк. тахса ылыаҕа. Бу туһунан регион баһылыга Айсен Николаев бэйэтин телеграм-ханаалыгар иһитиннэрдэ.
«Российскай Федерация бырабыыталыстыбата 16 регионҥа, биһиги өрөспүүбүлүкэбитин киллэрэн туран, коммунальнай инфраструктураны саҥардыыга 5 млрд солк.кэриҥэ үп көрдө. Итинтэн Саха Сирэ 2026 сылга 417,1 мөл.солк. уонна 2027 сылга 342,4 мөл. солк. ылыаҕа. Бу үп хочуолунайдары, ититэр ситимнэри тутууга, өрөмүөннээһиҥҥэ уонна маастар-былааннары олоххо киллэриигэ барыаҕа, ол куораттарбытыгар, сэлиэнньэлэрбитигэр олох тупсуутун, хаачыстыбатын үрдэтиэҕэ», — диэн Саха сирин баһылыга иһитиннэрдэ.
Субсидиялар президент Владимир Путин көҕүлээбит «Олох инфраструктурата» саҥа национальнай бырайыакка киирэр «коммунальнай инфраструктураны саҥардыы» федеральнайдааҕы бырайыак чэрчитинэн ыытыллыахтара.
This post was published on 14.08.2025 14:03 14:03