Саха сирэ олорор дьиэ-коммунальнай хаһаайыстыба эйгэтигэр бырайыактары олоххо киллэриигэ 869 мөл.солк. суумалаах казначейскай инфраструктурнай кирэдьиит ылыаҕа. Регион сайаапката Россия бырабыыталыстыбатын бэрэссэдээтэлин солбуйааччы Марат Хуснуллин салалтатынан суһал штаб мунньаҕар биһирэннэ, онно Саха сирин баһылыга Айсен Николаев кыттыыны ылла.
Бэриллибит үптэн Алдан оройуонугар үс бөдөҥ хочуолунай гаас оттукка көһөрүллүөҕэ уонна Нерюнгрига куорат маастар-былаанын чэрчитинэн итии ситимнэрэ саҥардыллыахтара.
Бырайыагы олоххо киллэрии сылааһы биэрии ситимин тириэрдии эрэллээх буолуутугар, уматыгы атыылаһыыга ороскуот аҕыйыырыгар, өрөмүөн үлэтин ыытыы чэпчииригэр, экология тупсуутугар туһалыаҕа.
«Олорор дьиэ-коммунальнай хаһаайыстыба эбийиэктэрин саҥардыы эрэ буолбакка, сарсыҥҥы күҥҥэ эрэллээх буолууну тэрийии туһунан кэпсэтэбит. Өрөспүүбүлүкэ хас биирдии олохтооҕун дьиэтин сылааһа чугас дьонугар доруобуйаны, куттал суох буолуутун уонна холку буолууну аҕалар. Бырайыак 2025-2027 сылларга олоххо киириэҕэ. Марат Шакирзянович Хуснуллиҥҥа уонна федеральнайдааҕы биэдэмистибэлэргэ өрөспүүбүлүкэбитигэр өйөбүлгүт, болҕомтоҕут иһин махтанабын», — диэн Айсен Николаев бэлиэтээтэ.
Санатан эттэххэ, эрдэ Российскай Федерация бырабыыталыстыбата 16 регионҥа коммунальнай инфраструктураны саҥардыыга биэс миллиард солкуобай кэриҥэ үбү көрбүтэ. Итинтэн Саха Сирэ 2026 сылга 417,1 мөл.солк. уонна 2027 сылга 342,4 мөл. солк. ылыаҕа. Субсидиялар президент Владимир Путин көҕүлээбит «Олох инфраструктурата» саҥа национальнай бырайыакка киирэр «Коммунальнай инфраструктураны саҥардыы» федеральнайдааҕы бырайыак чэрчитинэн ыытыллыахтара.
This post was published on 12.09.2025 11:08 11:08