21 Тохсунньу 21.01
  • -48°
  • $ 73,82
  • 83,32

Саха сирэ Ийэ күнүн бэлиэтиир

16:31, 14 октября 2016

Алтынньы 16 күнүгэр өрөспүүбүлүкэҕэ Ийэ күнэ бэлиэтэнэр. Маныаха сыһыары тутуллан Ийэ пааматынньыгар бүгүн тыыннаах сибэккини уурдулар.


«Хас да көлүөнэни төрөтөн, иитэн таһаарбыт Ийэлэргэ махтал тылларын тиэрдээри бүгүн манна муһуннубут. Кинилэр биһиэхэ олохторун бүтүннүүтүн анаабыттара», — диэтэ Саха сирин баһылыга Егор Борисов.

Ил Дархан Ийэ пааматынньыга дьүһүннээн көрдөрөр киһитинэн Таатта улууһун Байааҕа сэлиэнньэтин олохтооҕо Февронья Малгина буоларын эттэ. Аҕа дойду Улуу сэриитин кэмигэр кини биэс уола сэрии толоонугар тыыннара быстыбыта.

«Февронья Малгина — Ийэ оҕоҕо тапталын бастыҥ холобура. Бу күн мин аҕыс оҕону соҕотох атахтарыгар туруорбут Ийэбин саныыбын. Бу үгэс салҕанар: Саха сиригэр 17,5 тыһыынча элбэх оҕолоох ыал баар. Өрөспүүбүлүкэ бырабыыталыстыбата Ийэ буолууну өйүүргэ кыаллары барытын оҥорор», — диэтэ регион баһылыга.

Элбэх оҕолоох уонна эдэр ыаллары өйүүргэ судаарыстыба сокуоннара уонна бырагыраамалара үлэлииллэр. Парламент бэрэссэдээтэлин солбуйааччы Ольга Балабкина нэһилиэнньэ социальнай өттүнэн көмүскэллээх буолуутугар тохтоото.

0
0
21 января 21.01
  • -48°
  • $ 73,82
  • 83,32