Якутия «Саха Сирэ – геройдар Сирдэрэ» кадровай бырагыраама кыттыылааҕа, анал байыаннай дьайыы бэтэрээнэ Михаил Ан өрөспүүбүлүкэ гражданскай оборонаҕа уонна ЧС дьыалаларыгар министиэристибэтигэр стажировкатын түмүктээтэ. Кини уһуйааччытынан Саха сирин бырабыыталыстыбатын бастакы вице-премьерэ Дмитрий Садовников буолла.
«Дойдуну Көмүскээччилэр» пуонда филиалыгар бэлиэтээбиттэринэн, Михаил Ан сэрии хонуутугар эрэ буолбакка, эйэлээх олоххо бэйэтин миэстэтин ситиһиилээхтик булбут киһи. Кини бойобуой суола 2022 сыл балаҕан ыйыгар мобилизацияланыыттан саҕаламмыта. Бэбиэскэни ылыан иннинэ, кини кэргэнин кытары сулууспалыыр кыахтарын дьүүллэспитэ.
Мобилизация иннинэ Михаил оройуонугар хас да оскуола дириэктэринэн үлэлээбитэ, байыаннай сбордары ыытара уонна ыччаты байыаннай-патриотическай иитиинэн дьарыктаммыта. Кини көхтөөх кыттыыта суох биир да Кыайыы парадаата ааспатаҕа.
Кини биографиятыгар СВО зонатыгар уолун кытары сулууспалааһына ураты сирэйинэн буолла. Аҕа дойдуну көмүскээччини иитэн таһаарбытыгар уонна тус холобурунан “Саллаат Аҕата” мэтээли туппута.
СВО-тан төннөн кэлэн баран, Михаил «Дойдуну Көмүскээччилэр» пуондаҕа туһаайан, социальнай сүрүннээччи көмөтүнэн бойобуой дьайыы бэтэрээнин дастабырыанньатын ылан, патриотическай үлэҕэ көхтөөхтүк кыттыбыта. Сүрүннээччи сүбэтинэн «Саха сирэ — геройдар сирдэрэ” бырагыраамаҕа сайаапка түһэрбит уонна билигин кадровай оскуолаҕа ситиһиилээхтик үөрэнэр.
Бүгүн Михаил Ан Үөһээ Бүлүү көрдүүр-быыһыыр этэрээтин начаалынньыга уонна Үөһээ Бүлүү оройуонугар бойобуой дьайыылар бэтэрээннэрин Ассоциациятын бэрэссэдээтэлэ.
Санатан эттэххэ, «Саха Сирэ – геройдар сирдэрэ» кадровай бырагыраама Саха сирин баһылыга Айсен Николаев сорудаҕынан олоххо киирэр. Сүүмэрдээһини ааспыт 25 кыттааччы «судаарыстыбаннай уонна муниципальнай управление» хайысхаҕа идэнэн хаттаан бэлэмнэниини ааһаллар. Аныгыскы үөрэх сессията балаҕан ыйын 8 күнүгэр саҕаланар уонна региональнай уонна муниципальнай салайыы боппуруостарыгар ананыаҕа.
This post was published on 29.08.2025 16:06 16:06