«Азия оҕолоро» Норуоттар ардыларынааҕы сайыҥҥы спортивнай оонньуулар уоттарын Саха сирэ Приморскай кыраайга туттарда. От ыйын 27 — атырдьах ыйын 8 күннэригэр ыччат улахан түһүлгэтэ түстэнэр. Уот Өлүөнэ очуостарыгар умайбыта, суруйар СИА.
Уоту бырабыыталыстыба бэрэссэдээтэлин солбуйааччы Сергей Местников, Дьокуускай баһылыга Евгений Григорьев, «Азия оҕолоро» кэмитиэт президенэ Владимир Максимов туттардылар. Эстафета ыытылынна — Үс Хатыҥынан факелы биллэр спортсменнар сүүрдэн аастылар: марафоҥҥа Россия биэс төгүллээх чемпионката Сардана Трофимова, боксаҕа аан дойду вице-чемпиона Василий Егоров, буулдьанан ытыыга дойду кыайыылааҕа Алина Готовцева, чэпчэки атлетикаҕа дойдуга призер Данил Андросов.
Владимир Максимов уоту Приморскай кыраай спортка миниистирэ Жан Кузнецовка туттарда. «Биһиги Приморскай кыраай «Азия оҕолоро» оонньууну үрдүк таһымҥа ыытарыгар эрэллээхпит, дойду, аан дойду араас муннуктарыттан спортсменнар кыттыахтара», — диэтэ Сергей Местников.
Кини 2024 сылга «Азия оҕолоро» оонньуу Саха сиригэр ыытылларын эттэ.
