Саха сирин тирэх пууннарын үлэһиттэрэ анал байыаннай дьайыы зонатыгар Арассыыйа Сэбилэниилээх күүстэрин байыаннайдарыгар бойобуой соруктары толорорго биэс техниканы биэрбиттэр. Бу туһунан бүгүн, кулун тутар 19 күнүгэр, нэдиэлэ аайы ыытыллар брифиҥҥэ Юстас позывнойдаах АБДь зонатыгар өрөспүүбүлүкэ тирэх пууннарын кылаабынай сүрүннээччитэ иһитиннэрдэ. Ол туһунан www.sakha.gov.ru сайт суруйар.
«Анал дьайыы кыттыылаахтарын техническэй хааччыллыыларын уонна тэриллэрин чааһыгар эбии көмөнү оҥоруу чэрчитинэн бу нэдиэлэ иһигэр байыаннай чаастарга, ол иһигэр «Боотур» БАРС-2 этэрээккэ, Саха сирин Хотугулуу-Илиҥҥи уонна Донбаһы өйүүр пуондатыттан уонна атын тэрилтэлэриттэн киирбит биэс тырааныспар тигистэ», – диэн чуолкайдаата Юстас.
Кини механиктар бөлөхтөрүнэн биир нэдиэлэ иһигэр ДНР сиригэр өрөспүүбүлүкэ тирэх пууннарыгар өссө сэттэ «Якт-Сокол» квадроцикл байыаннай кыаҕын чөлүгэр түһэрбиттэрин бэлиэтээтэ. «Россия Сэбилэниилээх күүстэрин подразделениеларын үрдүк бойобуой кыахтааҕын өйүүр сыалтан механиктар өссө 19 байыаннай техниканы тохтоло суох хааччыйыыны уонна өрөмүөннээһини салҕыыллар», – диэн спикер кэпсээтэ.
Юстас этэринэн, тирэх пууннар үлэһиттэрэ нэдиэлэ иһигэр фронт таһыгар 17 марш оҥорбуттар уонна Саха сириттэн байыаннайдарга 197 аадырыстаах баһыылканы аҕалбыттар. Маны сэргэ Өлөөн улууһуттан делегацияны арыаллааһын хааччылынна. Бойобуой дьайыы зонатыгар сураҕа суох сүппүт буойуннары көрдөөһүн үлэтэ куруук ыытыллар.
Санатан эттэххэ, анал байыаннай дьайыы байыастарын өйүүр үлэни “Кыайыыга бииргэ!” диэн өрөспүүбүлүкэтээҕи хамыыһыйаны Саха сирин баһылыга, «Биир Ньыгыл Россия» баартыйа Саха сиринээҕи региональнай салаатын сэкирэтээрэ Айсен Николаев салайар.
