Саха Сиригэр аан бастаан эр дьон уонна дьахталлар ортолоругар мас-рестлиҥҥэ Россия чемпионатын ыытар былааннаахтар. Сүүрбэччэ сыл иһигэр саха национальнай көрүҥэр Россия иһинээҕи сүрүн старт өрөспүүбүлүкэ сиригэр-уотугар ыытылла илик, диэн ЯСИА иһитиннэрэр.
Нерюнгри оройуона Саха сирин муниципальнай тэриллиилэриттэн мас-рестлиҥҥэ Россия официальнай чемпионатын ыытар бастакы буолуоҕа. Ону 2026 сыл кулун тутар иккис аҥарыгар тэрийэр былааннаахтар.
Саха сиринээҕи старт Россия спортсменнара аан дойду, Европа чемпионаттарыгар, ону тэҥэ аан дойдутааҕы кочевниктар оонньууларыгар кытталларыгар сүүмэрдиир түһүмэх буолуоҕа. Бу туһунан ЯСИАҕа Бүтүн Россиятааҕы мас-рестлинг Федерациятын президенэ Михаил Гуляев кэпсээтэ.
Россия чемпионаттарын Москваҕа түөрт төгүл ыыппыттара, икки төгүл Санкт-Петербурга, Красноярскайга, Долгопруднайга, Нальчикка буолбута. Ону сэргэ күрэхтэһиини дойду регионнарыгар мас-рестлины пропагандалыыр сыалтан Казань, Уфа, Тверь куораттарга тэрийбиттэрэ.
Оттон эдэр мас-рестлердарга Россия күрэхтэһиитин эһиил муус устар ыйга Чебоксарга туспа тэрийэр былааннаахтар.
Санатан эттэххэ, Дьокуускайга быйыл Нерюнгри оройуонун 50 сылын чэрчитинэн мас-рестлиҥҥа өрөспүүбүлүкэтээҕи бөдөҥ турнир ыытылынна. Онно абсолютнай кыайыылаахтар ааттарын Булуҥ улууһуттан Иван Болтунов, Дьокуускайтан Артем Ветров, ону тэҥэ Амматтан Татьяна Баишева ылбыттара.
