«Сахафильм» киинэ хампаанньатын икки бырайыага аан бастакытын Россия култууратын министиэристибэтин куонкуруһун финалистарынан буоллулар. Кинилэр киинэ усталларыгар субсидия ылыахтара, СИА-ҕа тустаах биэдэмистибэ пресс-сулууспата иһитиннэрдэ.
Любовь Борисова оҥорбут бырайыага сотору кэминэн үбүлэниэҕэ, онтон Эдуард Новиков үлэтэ сыл бүтүөр диэри үбүлэниигэ саппааска киллэрилиннэ. Саха сирин кинематографистарын ситиһиитин саха киинэтин сайдыытын саҥа түһүмэҕинэн сыаналыахха сөп. «Сахафильм» бэйэтин бырайыактарын аан бастаан Москва киинэ устуудьуйаларын кытта устуоҕа.
Субсидия ылыытыгар кинематография Департамена ыыппыт куонкуруһа сайын ыытыллыбыта. Финалга Саха сириттэн икки бырайыак киирбитэ — Любовь Борисова «Не хороните меня без Ивана» киинэтэ «Студия Автор» ХЭУо Москва устуудьуйатын уонна продюсер Иван Болотниковтыын уһуллара былааннанар. Оттон Эдуард Новиков «Связующая нить» киинэтэ «Кинопроба» ХЭУо Москва устуудьуйатын, продюсер Юрий Обуховы кытта.
«Сахафильм» дириэктэрэ Дмитрий Шадрин иһитиннэрбитинэн, саха киинэтэ аан бастаан федеральнайдааҕы үбүлээһини ылар.
