РФ ИДьМ-тын Саха Өрөспүүбүлүкэтээҕи министиэристибэтин Экономическай буруйдары уонна коррупцияны утары охсуһар управлениетын сотрудниктара Өймөкөөннөөҕү Ис дьыала отделын полицейскайдарын кытта ОМОН байыастарын көмөтүнэн тэрээһиннээх бөлөҕү туттулар.
Бу бөлөх кыттыылаахтара күндү металлары сокуоннайа суохтук эргитиигэ уорбаланаллар. Суһал иһитиннэриини бэрэбиэркэлээһин кэмигэр полиция үлэһиттэрэ икки массыынаны тохтоппуттар.
Тутуллубут дьонтон 2 кг тахса ыйааһыннаах рудаттан араарыллыбыт кыһыл көмүстээх бытыылканы, 8 мөл. солк. тахса суумалаах харчыны, сиэпкэ угуллар электроннай ыйааһыны, баан чиэктэрин, ону тэҥэ, 6 мөл. солк. сууманы кытары ювелирнай оҥоһуктар сыаналарын толуйар сертификаты буллулар.
Онтон уорбаланааччылар дьиэлэригэр дьэҥдьиир кэмигэр 2 мөл. 800 тыһ. солк. кэриҥэ харчыны, баан чиэктэрин уонна сиэпкэ угуллар электроннай ыйааһыннары булан былдьаатылар. Маны таһынан, старателлэр артыалларыттан биирдэстэригэр оперативниктар түөрт үлэһиттэн рудаттан араарыллыбыт кыһыл көмүс симиллибит 9 полиэтиленовай суутун буллулар. Испэсэлиистэр этэллэринэн, ити суулаах көмүс сыаната 3,5 мөл. солк. тэҥнэһэр.
Бу чахчынан холуобунай дьыалалар тэрилиннилэр. Уорбаланааччылартан иккитэ хаайылынна, онтон атыттарга хаарчахтыыр миэрэ быһыытынан, ханна да барбат туһунан баппыыска туттулунна.
Бу туһунан РФ ИДьМ-тын СӨ ИДьМ-тын пресс-сулууспата иһитиннэрдэ.
This post was published on 07.04.2016 13:03 13:03