Кэнники кэмҥэ олох сайдан аныгылыы тутуулаах килэйбит, кыраҺыабай көстүүлээх тутуулар, дьон олороругар аналлаах элбэх квартиралаах таас эркиннээх, элбэх этээстээх дьиэлэр дьэндэҺэллэр. Аныгылыы тупсаҕай көрүҥээх чааҺынай дьиэлэри тутар буоллулар.
Тутуу технологията сайдан билигин араас матырыйааллар бааллар: тимир лиистэн саҕалаан полусфера, винилсайдинг, поликарбонат, полистирол, изоспан, изовер, гипсокартон, базалит уо.д.а. матырыйааллары дьон бары дьиэтигэр-уотугар, күрүөҕэ-хаҺааҕа баҺын билэн тутталлар. Саха киҺитэ дьиэни-уоту тутууга сыстан, элбэҕи анааран көрөн, мындыр өйүн киллэрэн, баҕа санаатынан салайтаран толору хааччыллыылаах мас дьиэни туттарга дьулуҺар. Хатыламмат, көрүөхтэн кэрэ көстүүлээх дьиэни тутан таҺааран тэлгэҺэтигэр, олорор түөлбэтигэр, ааҺа баран нэҺилиэгэр, куоратыгар тупсаҕай көрүҥү биэрэр.Тутуллубут дьиэ хас биирдии дьиэ хаҺаайынын тус айылгытын туох дьарыктааҕын кэпсиир аналлаах. Кэнники кэмҥэ дьиэ ис бараанын оҥорууга матырыйаал арааҺа дэлэйэн, дьон таптаабытынан туттар, тупсаран оҥорор буолла. Тутууга сыҺыаннааҕы этэр буоллахха, Ньурбаҕа сыана куорат сыанатынааҕар 1,5-2 төгүл үрдүк. Уопсайынан дьиэ тутуута үгүөрү үбү-харчыны эрэйэр буолан баран, дьон-сэргэ бэйэ бас билэр дьиэлээх-уоттаах, тэлгэҺэлээх буолуон баҕарар. КыҺынын тыйыс тымныылаах, сайынын өҥүрүк куйаастаах Сахабыт сиригэр ханнык маҺы дьиэ тутуутугар тутталларын туҺунан Ньурба куорат олохтооҕо, урбаанынан дьарыктанар Игорь Федоров ыйытыыбар кини сүрүннээн тутууга бэс маҺы тутталларын, дьиэ акылаатыгар монолит (полистирол) үрдүгэр обрешеткалаан сиэмэн кутуллара ордук үйэлээҕин эттэ. Игорь Михайлович бэйэтин туҺунан бу курдук билиҺиннэрдэ: «Мин аҕам Михаил Семенович худуоҺунньук-киэргэтэн оҥорооччу идэлээх этэ. Кини бэйэтэ соҕотоҕун дьиэ тутан дьэндэтээччи, ону көрө сылдьан үөрэнэн ууска сыҺыаннаахпын. Оскуола саҕаттан маастар Борисов Анатолийга уҺуйуллан чороон, оҺуор кыҺарга үөрэнэн кинилиин үлэлээбитим. Итинтэн саҕалаан уҺанан миэбэл оҥоробун, сайыҥҥы өттүгэр дьон сакааҺынан дьиэ тутабыт. 2012 сыллаахха индивидуальнай предприниматель буолбутум. Михайлова Н.М. салайааччылаах Ньурбатааҕы «Биисинэс-инкубатор» урбааны өйүүр Киин грант көрөн улахан күүс-көмө буолбуттара. МаҺынан уҺанар столяркалаах буоламмыт сакааска араас миэбэли оҥоробут. БиҺиги үс буолан үлэлиибит. Маалыкайтантөрүттээх, маска сыстаҕас, бэйэтэтуспа көрүүлээх-истиилээх Семен Васильевтыын, Игорь Яковлевтыын бары бииргэ сэбиэттэҺэн күн бокуойа суох үлэлиибит.Түгэнинэн туҺанан, тутууга сыҺыаннаах дьоннору Тутааччылар күннэринэн итиитик-истиҥнник эҕэрдэлиибин. Доруобуйаны, ситиҺиини, этэҥҥэ буолууну баҕарабын!», — диэн биир идэлээхтэрин эҕэрдэлээтэ.
