Барыллаан суоттааһынынан, Саха сиригэр регионнааҕы уонна муниципальнай суоллар халаан уутугар алдьаныыларын хоромньута 570 мөл солк тэҥ. Ол туһунан суол миниистирин солбуйааччыта Семен Коркин эттэ.
Чуолкайдаммытынан, регион суолталаах суолларга хоромньу 258 мөл солк, олохтооххо — 312 мөл солк. Миниистир солбуйааччыта эппитинэн, халаан уутугар 136 учаастак алдьанна, ол иһигэр 27 регионнааҕы, атыттара — муниципальнайдар.
«Муниципальнай тэриллиилэр хамыыһыйалара хоромньуну төннөрүүгэ смета бэлэмнээһинин уонна үлэни ыытыыны саҕалаатылар», – диэтэ Семен Коркин.
Билигин бары суолларга айан аһаҕас. Чөлүгэр түһэрэр үлэлэр тохтоло суох ыытылла тураллар. Үбүлээһин Саха сирин суол пуондатыттан көрүллэр.
This post was published on 28.05.2024 10:33 10:33