15 От ыйа 15.07
  • 30°
  • $ 87,74
  • 95,76

Сааһыттар куһу-хааһы кэтээн, дурдаҕа тоҥоллоро-хаталлара чугаһаата

18:17, 18 апреля 2018
Текст:
Читайте нас на
Яндекс Новости
ЯДВ

Айылҕа харыстабылын пресс-сулууспата иһитиннэрэринэн, быйыл сааскы булт сезонун Саха сиригэр бастакынан Абый, Үөһээ Халыма, Өлөөн, Эбээн Бытантай улуустарыгар арыйыахтара.

Ити улуустарга ыам ыйын 6-8 күннэригэр хааһы бултааһын көҥүллэнэр. Онтон ыам ыйын 10-12 күннэригэр Эдьигээн, Мииринэй (Айхал уонна Удачнай бултанар сирдэригэр) уонна Орто Халыма улуустарыгар хаастыахтара. Ыам ыйын 16-18 күннэригэр Аллайыаха, Дьааҥы уонна Аллараа Халыма, ити ый 24-26 күннэригэр Анаабыр, Булуҥ, Усуйаана хоһуун дьоно хааска олоруохтара.

Кус-хаас атыырыгар сааланыы Алдан, Амма, Ленскэй, Мэҥэ Хаҥалас, Нам, Нерюнгри, Өлүөхүмэ, Сунтаар, Таатта, Томпо, Уус Алдан, Уус Маайа, Хаҥалас, Чурапчы улуустарыгар уонна Дьокуускай куоракка ыам ыйын 11-тэн 20 күнүгэр диэри көҥүллэнэр. Оттон Үөһээ Бүлүү, Бүлүү, Горнай, Мииринэй (Айхал уонна Удачнай бултанар сирдэриттэн ураты), Ньурба, Өймөкөөн улуустарыгар ыам ыйын 14-23, Муомаҕа 16-25 күннэригэр куһу ытыахха сөп. Ыам ыйын 31 күнүттэн бэс ыйын 6 күнүгэр диэри Абый, Үөһээ Халыма, Дьааҥы, Эдьигээн, Өлөөн, Орто Халыма, Эбээн Бытантай улуустарыгар уонна Мииринэй оройуонугар Айхал уонна Удачнай бултанар сирдэригэр кустааһын сезона салҕанан барар. Булуҥҥа уонна Аллараа Халымаҕа бэс ыйын 1-7, Анаабырга, Аллайыахаҕа уонна Усуйаанаҕа бэс ыйын 4-10 күннэригэр кустуохтара.

Андыга сааланыы быйыл эмиэ көҥүллэннэ. Онон, үгэс курдук, бэс ыйын 1-4 күннэригэр Амма, Үөһээ Бүлүү, Бүлүү, Горнай, Кэбээйи, Мэҥэ Хаҥалас, Муома, Нам, Өймөкөөн, Таатта, Томпо, Уус Алдан, Хаҥалас, Чурапчы улуустарын олохтоохторо андыны күүтүөхтэрэ. Хаҥалас улууһугар Өлүөнэ өрүс сүнньүгэр эрэ бултуур көҥүллэнэрин санатабыт.

Мас көтөрүгэр (улар уонна куртуйах атыырдарыгар) булт сезона ыам ыйын 7 күнүттэн 16 күнүгэр диэри Амма, Горнай, Ленскэй, Хаҥалас улуустарыттан ураты барыларыгар арыллар. Хагдаҥ эһэни сонордоһуу муус устар 23 күнүттэн бэс ыйын 6 күнүгэр диэри, квота баар буоллаҕына, бары улуустарга көҥүллэнэр.

Василий НИКИФОРОВ, edersaas.ru

 
Следите за самым важным и интересным в Telegram-канале и WhatsApp-группе ЯСИА