Саха сиригэр эрэ буолбакка, Арассыыйаҕа гражданскай сэрии бүтэһик кыргыһыыта Аммаҕа, Абаҕа сиригэр-уотугар буолбута биллэр. 1923 сыллаахха Абаҕа нэһилиэгэр баар Саһыл Сыһыы алааһыгар 18 күннээх тоһууру тулуйан, Иван Строд хамандыырдаах кыһыл этэрээтэ кыайыылаах тахсыбыта. Бу историческай суолталаах миэстэ урут уруккуттан дьон-сэргэ интэриэһин тардар. Билигин үбүлүөйдээх датаны көрсө манна үгүс үлэ ыытыллара күүтүллэр.
Амма улууһун баһылыга Николай Архипов, баһылыгы тутууга уонна инфраструктураҕа солбуйааччыта Виктор Смирников, култуура нэһилиэстибэтин эбийиэктэрин харыстыыр өрөспүүбүлүкэ департаменын салайааччыта Николай Афанасьевич Макаров сүбэ мунньах тэрийдилэр.
«Иллэрээ сылтан Саһыл Сыһыы 100 сыллаах үбүлүөйүгэр бэлэмнэнии үлэтин ыытан саҕалаабыппыт. Манна Саһыл Сыһыыны тупсаран оҥоруу, мемориальной комплексы тутуу бырайыагар 1923 сыллаах хартыынаны оччотооҕу кэм дьиэлэрин-уоттарын, баррикаданы, оҕус үктүүр миэлиҥсэтин көрдөрүөхтээхпит. Маны Вячеслав Яроев салайааччылаах «Уран» дизайн устуудьуйа тэрилтэтэ оҥоро сылдьар«, — диэн кэпсээтэ Виктор Смирников.
Кини эппитинэн, бырыайыак үбүн кээмэйэ 3 мөл 500 тыһ солк тэҥнэһэр, ол иһигэр 2 мөл 700 тыһ солк мемориальнай комплексы тутуу киирэр. Маны тэҥэ Саһыл Сыһыы устуоруйа уонна култуура пааматынньыктарын харыстыыр, ураты харыстанар сир аатын сүгэр.
«Сахабыт сирин инвестиционнай бырагырааматыгар бырайыактары оҥорууга быйылгы бүддьүөккэ көрүллүбүт харчыны тыырыы хамыыһыйатын көрүүтүгэр киллэрэргэ быһаардылар. Мантан сайын бырайыагы түмүктээн, үлэтин саҕалаан, тутуутун ыытан барыахтаахпыт. Быһа холоон үлэ кээмэйэ 58 643 000 солк буолар диэн суоттанан олоробут«, — диэтэ кини.
Гражданскай сэрии тыҥааһыннаах киирсиилэрэ буолбут сиригэр Саһыл Сыһыыга эһиилги 100 сыллаах үбүлүөйүгэр туристическай комплекс тутуллан бэлэм буолуохтаах. Маны быйыл Абаҕа нэһилиэгэ тэриллибитэ 250 сылыгар сыһыаран оҥорор былааннаахтар, үбүлээһинин күүтэллэр, суруйда https://www.instagram.com/amga_adm_official/
