Саҥа тутуллар дьиэҕэ сыана олоҕо суох үрдүүрүн тохтоторго СӨ Тутуутун министиэристибэтэ тутуу хампаанньаларын кытта сөбүлэһии түһэристэ.
Кулун тутар 1 күнүнээҕи туругунан 9 тэрилтэни «РИА» АУо, «Прометей», «СЭТТЭ», «Строй-Индустрия», «АЭБ Капитал», «Высота», «СахаСтройСервис», «Алмазная Корона Приполярья», «МСЗ АРТ» ХЭТ кытта СӨ Тутуутун министиэристибэтэ сөбүлэһиигэ илии баттастылар.
Бу туһунан edersaas.ru СӨ Тутуутун министиэристибэтин пресс-сулууспатыгар сигэнэн иһитиннэрэр.
«Ити сөбүлэһии чэрчитинэн нэһилиэнньэ дьиэ атыылаһарыгар удамыр сыаналаах дьиэни тутарга, биир м2 сыаната үүнэ-тэһиинэ суох үрдүүрүн бопсорго өрүттэр бииргэ үлэлэһиэхтэрэ. Тутуу министиэристибэтэ өрөспүүбүлүкэ тутааччыларын кытта тэҥ бырааптанан баҕа өттүнэн, бэйэ-бэйэни ытыктаһан Уһук Илин ипотека бырагырааматын сайыннарарга күүстэрин түмүөхтэрэ. Уһук Илин бэриллэр ипотеканы олоххо киллэрэргэ баар мэһэйдэри туоратарга кирэдьиит биэрэр тэрилтэлэри, уопсастыбаннай, эспиэртнэй түмсүүлэри кытта үлэ түмүктээх буоларын ситиһиэхтэрэ», — диэн эттэ Тутуу миниистирэ Павел Аргунов.
Хаартыска СӨ Тутуутун министиэристибэтин пресс-сулууспатыттан
This post was published on 18.03.2020 14:19 14:19