Эр дьон уонна дьахталлар ортолоругар мас-рестлиҥҥэ үгэскэ кубулуйбут «Саҥа ааттар» өрөспүүбүлүкэтээҕи турнир алтынньы 18-19 күннэригэр Дьокуускайга «Модун» спорткомплекска буолуоҕа. Күрэхтэһии саҥа саҕалыыр спортсменнар кытталларынан уратылаах, диэн ЯСИА иһитиннэрэр.
«Кыттыыны саҥа саҕалыыр спортсменнар ылыахтарын сөп. Спорт маастардара, ону тэҥэ эр дьон уонна дьахталлар ортолоругар өрөспүүбүлүкэтээҕи, Россиятааҕы турнирдар чемпионнара уонна призердара кытталлара көҥүллэммэттэр. Ол иһигэр ааспыт «Саҥа ааттар» турнирдар кыайыылаахтара уонна призердара», — диэн Саха сирин мас-рестлиҥҥэ федерацията ЯСИА-ҕа кэпсээтэ.
Күрэхтэһиигэ аатырбыт мас-рестлердар суох буолуохтара. Ити эдэр спортсменнарга эрэ буолбакка, бу көрүҥүнэн дьарыктаныан баҕалаах саастаахтарга бэйэлэрин көрдөрөллөрүгэр кыах биэрэр. Саха сирин сүүмэрдэммит хамаандатыгар үгүс киирсээччилэр бэйэлэрин суолларын чуолаан «Саҥа ааттар» турниртан саҕалаабыттара.
Кэлэр турнир өссө биир уратыта — эр дьон ортолоругар 55 киилэҕэ диэри ыйааһыннаах категория киллэрилиннэ. Үксүгэр бу категорияҕа күрэхтэһии ыытыллыбата. Спортсменнар эдэр саастарыттан улахан дьоҥҥо көһүүлэрин учуоттаан киллэрилиннэ.
Эр дьоҥҥо бастыҥнары биллэриэхтэрэ 55, 60, 65, 70, 75, 80, 85, 90, 105 киилэҕэ итиэннэ 105 киилэттэн тахса. Оттон дьахталлар 50, 55, 60, 65, 70, 75 киилэҕэ уонна 75 киилэттэн тахсаҕа бэйэлэрин боруобаланыахтара.
Бастакы киирсиилэр алтынньы 18 күнүгэр буолуохтара, сарсыныгар финаллар былааннаналлар. Ыйааһын уонна сэрэбиэй алтынньы 17 күнүгэр ыытыллыаҕа.
This post was published on 07.10.2025 17:31 17:31