90-с сыллар ааспатахтарын курдук! Дьокуускай куоракка 19 саастаах уолаттар 34 саастаах киһини үс сууккаттан ордук кэмҥэ дьиэҕэ хаайан олорон кырбаабыттарын ааһан, өссө 68 тыһ. солк. харчытын былдьаабыттар.
Дьокуускай куорат полициятын дьуһуурунай чааһыгар балыыһаттан суһал иһитиннэрии киирбит. Этэ-сиинэ бүттэтэ суох гына кырбаммыт эдэр киһи киллэриллибитин туһунан.
Онно тиийбит суһал-силиэстийэлиир бөлөххө бу тыыннаах ордубут эмсэҕэлээччи кэпсээбитинэн, кинини икки уол үс сууккаттан ордук кэм иһигэр кыбартыыраҕа күүстэринэн хаайан олорон кырбаабыттар уонна 68 тыһ. солк. харчытын былдьаабыттар.
Барыллаан быһаарыынан, кини бу уолаттары кытта түүҥҥү кулуупка билсибит, онтон салгыы уолаттар куортамнаабыт кыбартыыраларыгар барсыбыт. Дьэ, ол барсан, аад айаҕар киирэн биэрээхтээбит: дьиэттэн таһаарбакка, харчы түүрэйдээннэр, тимиринэн уонна алдьаммыт бытыылканан кырбаабыттар.
Ол тухары кини иэстээҕин курдук араспыыска суруттара сатаабыттар, өскөтүн кини полицияҕа тыллаатаҕына итинэн куотунаарылар. Ити курдук сордоон-муҥнаан, төрдүс сууккатыгар биирдэ ыыппыттар.
Полиция оперативниктара үс күн устатыгар уорбаланааччылар кимнээхтэрин быһааран, ханна баалларын билбиттэр. Уонна бу Мииринэйтэн уонна Горнайтан төрүттээх урдустары дьиэ техэтээстэригэр саһа сылдьыбыттарын туппуттар.
Уорбаланааччылар билиммиттэринэн, кинилэр түүҥҥү кулуупка элбэх харчылаах киһини өйдөөн көрөн, харчытын былдьыырга быһаарыммыттар.
Бу чахчынан РФ Холуобунай кодексатын 162-с ыст. 2-с чааһынан, ол эбэтэр, бөлөҕүнэн талааһын бэлиэтэ баарынан, холуобунай дьыала тэриллибит. Бу күннэргэ кинилэргэ өссө атын ыстатыйаларынан эмиэ буруй тиксэриллиэҕэ.
Уорбаланааччылар Силиэстийэлиир изоляторга хаайылыннылар.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыскалар: интэриниэттэн уонна СӨ ИДьМ-тын пресс-сулууспата.
This post was published on 25.04.2018 10:02 10:02