21 Тохсунньу 21.01
  • -48°
  • $ 73,82
  • 83,32

Сүһүөх ыарыытын эмтээһин саҥа кирбиилэрин дьүүллэстилэр

12:30, 22 февраля 2016
Текст:

Ааспыт нэдиэлэҕэ Дьокуускай куорат клиническэй балыыһатын ревматологияҕа отделениета тэриллибитэ 25 сылыгар аналлаах научнай-практическай конференция ыытылынна. Конференцияҕа Саха сиригэр ревматология сулууспатын төрүттэниитин уонна сайдыытын кэрдиис кэмнэрин, ревматология ыарыыларын уонна эмтээһин инновационнай ньымаларын дьүүллэстилэр.


1994 сылтан ревматология отделениетын СӨ Доруобуйа харыстабылын министиэристибэтин штаты таһынан кылаабынай ревматолога, СӨ үтүөлээх бырааһа, РФ уонна СӨ доруобуйа харыстабылын туйгуна Ольга Маркова салайан кэллэ.

Ревматология отделениета билигин куорат эрэ буолбакка, өрөспүүбүлүкэ бары улуустарын ыарыһахтарын эмтиир соҕотох анал отделениенан буолар. 2008 с. отделениеҕа бэйэтигэр ревматология куораттааҕы Киинэ аһыллыбыта эмиэ ылбычча быһаарыныы буолбатах этэ. Тоҕо диэтэххэ, сүһүөх ыарыыларыгар Саха сирин көрдөрүүтэ Россия көрдөрүүлэрин 1,5-2 төгүл аһарар уонна өссө элбиир чинчилээх. Бу ыарыы биир ыарахан содулунан ыарыыны эрдэттэн быһааран эмтээбэтэххэ, ыарыһахтар (ол иһигэр, үлэлиир саастаах эдэр дьон) инбэлииккэ тахсар кутталлаахтара буолар. Киин сүрүн соругунан сүһүөх ыарыыларын кэмигэр быһаарыы, патогенетическай терапия хаачыстыбатын тупсарыы, нэһилиэнньэҕэ көмөнү оҥорууну элбэтии буолаллар. Отделениены сэргэ ревматолог-быраас сүбэ-ама биэрэр кабинета, Антицитокиновай терапия киинэ, остеопороһы сэрэтэр уонна эмтиир кабинет уо.д.а. аһыллыбыттара.

Отделение быраастара Россия ревматологтарын ассоциациятын чилиэннэринэн буолаллар, Москваҕа ревматология научнай-чинчийэр институтугар үөрэнэллэр. Иркутскай, Новосибирскай, Москва, Казань, Санкт-Петербург куораттар профессордара кыттыылаах научнай-практическай конференциялар ыытыллаллар. Саха сирин ревматолог-быраастара Россияҕа ыытыллар конференцияларга, конгресстарга уонна съезтэргэ көхтөөхтүк кытталлар. Ольга Гаврильевна Россия делегациятыгар киирсэн, 2011 с. Лондоҥҥа уонна 2013 с. быраас С.В. Дьячковскайы кытта Мадридка ыытыллыбыт EULAR аан дойдутааҕы конгресстарга кыттыбыта.

Отделение кэлэктиибэ иннин диэки хардыылыыр, аныгы ньымалары олоххо киллэрэр, быраастар уонна сиэстэрэлэр билиилэрин үрдэтинэллэр. Ол курдук, быраастар Г.Р. Саввина уонна С.В Дьячковская – үрдүк категориялаах ревматологтар, СӨ доруобуйа харыстабылын туйгуннара. Медицинскэй сиэстэрэлэр Лира Петровна Иванова, Валентина Владимировна Шестакова, Ирина Сергеевна Дуйкова СӨ доруобуйа харыстабылын туйгуннарынан буоллулар.

Конференцияҕа этиллибитинэн, сүһүрэн ыалдьар ыарыылар, ревматоиднай артрит, тоноҕос ыарыыта (дьоҥҥо биллэринэн, Бехтеров ыарыыта) элбээтилэр. Билигин бу ыарыылары эрдэ, ыарыы сана саҕаланар стадиятыгар сатаан уонна сөпкө быһаарар буоллулар.

Ыарыы саҥа саҕаланна да, түөрт-алта нэдиэлэ иһигэр быһааран, сүрүн эмп ананыахтаах диэн аан дойдутааҕы бырагыраама 2010 сылтан үлэлиир (ревматоиднай артритка, Бехтерев ыарыытыгар уо.д.а). Ол аата, ыарыһах билиҥҥи туругун эрэ буолбакка, ыарыы хаптайарын, туох да улахан содула суох буоларын курдук эмтииллэр. Бу ыарыылартан сүһүөх алдьанарыттан, тоноҕос тула баар иҥиирдэр таастыйан хаалалларын сэрэтэллэр. Оччоҕо ыарыһах хамсыыр туруктаныан, инбэлииккэ тахсыбакка үлэлиэн, уопсастыба ортотугар сылдьыан сөп.

0
0
21 января 21.01
  • -48°
  • $ 73,82
  • 83,32