2026 сылга ыам ыйынааҕы бырааһынньыктар, саҥа дьыллааҕы уһун каникуллартан сылтаан, кэнники аҕыс сылга саамай кылгас буолуохтара. Бу туһунан ТАСС-ка Госдуума үлэ, социальнай бэлиитикэ уонна бэтэрээннэр дьыалаларыгар кэмитиэтин чилиэнэ Екатерина Стенякина («Биир Ньыгыл Россия») иһитиннэрдэ.
“2026 сылга Россия олохтоохторун кэнники аҕыс сылга саамай кылгас ыам ыйынааҕы бырааһынньыктар күүтэллэр”, — диэтэ депутат, бу “түбэһиэх буолбатах, үлэ халандаара уопсайынан хайдах үөскүүрүн түмүгэ » диэн тоһоҕолоон бэлиэтээтэ. «Саҥа дьыллааҕы бырааһынньыктар 2026 сылга рекорд уһуннук — 12 күн устата барбыттара: 2025 сыл ахсынньы 31 күнүттэн 2026 сыл тохсунньу 11 күнүгэр диэри. Ити ыам ыйыгар бырааһынньыктарга сабыдыаллаата», — диэн Стенякина бэлиэтээтэ.
Ыам ыйын 1 уонна 9 күннэрэ бырааһынньык күннэрин курдук бэлиэтэммиттэрин, атыннык эттэххэ, барыта өрөбүлү көһөрүү систиэмэтиттэн тутулуктааҕын санатта. Стенякина ыам ыйын кэнниттэн кэлэр уһун өрөбүллэр бэс ыйыгар (12 – 14 чыыһылаларга) буолалларын бэлиэтээтэ.
2026 сылга ыам ыйынааҕы бырааһынньыктарга үлэлээбэт күннэр ыам ыйын 1-3 күннэрэ (бээтинсэ — өрөбүл) уонна ыам ыйын 9-11 күннэрэ (субуота — бэнидиэнньик), уопсайа алта күн буолуохтара.
2022, 2024 уонна 2025 сыллардаахха ыам ыйыгар бырааһынньыктар уопсайа аҕыс күн устата барбыттара (түөрт күн бастакы ыам ыйынааҕы уонна түөрт күн иккис). 2023 с. — сэттэ күн (үс күн уонна түөрт күн сөп түбэһиннэрэн). 2020-2021 сылларга ыам ыйынааҕы бырааһынньыктар икки ардыларыгар ковидтан сылтаан үлэлээбэт күннэр бааллара, 2019 сыллаахха ыам ыйынааҕы бырааһынньыктар уопсайа тоҕус күн устата барбыттара, онтон 2018 сыллаахха Арассыыйа олохтоохторо бастакы ыам ыйынааҕы бырааһынньыктарга түөрт күн уонна Кыайыы Күнүгэр биир эрэ күн сынньаммыттара.
