Россияҕа норуоттар сомоҕолоһууларын уонна Саха сиригэр култуура сылларынан Дьокуускайга, норуот маастардарын күнүн чэрчитинэн, «Россия норуоттарын оһуордара» панно оҥоруутугар өрөспүүбүлүкэтээҕи куоҥкурус ыытыллар. Өрөспүүбүлүкэ араас муннуктарыттан 20 талааннаах маастар араас тигии техникаларынан бэйэлэрин панноларын айаллар, диэн www.sakha.gov.ru сайт иһитиннэрэр.
Кыттааччылар Бүлүү, Горнай, Мэҥэ Хаҥалас, Мииринэй, Нам, Өлүөхүмэ, Сунтаар, Уус Алдан, Хаҥалас, Чурапчы, Эбээн-Бытантай оройуоннара, Дьокуускай куорат таһынааҕы Хатас сэлиэнньэтэ уонна Дьокуускай куорат.
Тэрийээччилэр этэллэринэн, куоҥкурус декоративнай-прикладной ускуустуба үгэстэрин харыстыыр, улаатыннарар эрэ буолбакка, национальнай орнамент кэрэтин нөҥүө омуктар икки ардыларынааҕы биир санааланыыны бөҕөргөтөр аналлаах.
Дьүүллүүр сүбэ чилиэннэрэ уонна көрөөччүлэр этиллибит эскизтэрин үрдүк таһымын уонна илии иистэрин толоруу филиграннай техникатын бэлиэтииллэр. Кыттааччылар үлэлэрэ үгэстэри дириҥник билиини эрэ буолбакка, хас биирдии панноны искусство айымньытыгар кубулутан чаҕылхай тус-туһунан истиилинэн көрдөрөллөр, диэн этэллэр.
«Маастардар илиилэрин сылааһын, норуот дууһатын сап, иннэ нөҥүө харыстабыллаахтык тиэрдэллэрин көрөр-истэр дьиҥнээх дуоһуйуу. «Россия норуоттарын оһуордара» куоҥкурус ааспыты инникини кытта ситимниир муоста уонна биһиги норуот маастардарбыт үрдүкү идэлээхтэрин көрдөрөр былаһаакка буолар», — диэн «Симэх» национальнай киин директора Яна Игнатьева үллэһиннэ.
Куоҥкурус түмүгэ панноҕа үлэ түмүктэннэҕинэ оҥоһуллуоҕа. Кыайыылаахтар лауреат аатын, сыаналаах бириистэри ылыахтара. Бастыҥ үлэлэр кулун тутар 10-20 күннэригэр А.Е. Кулаковскай аатынан норуоттар доҕордоһууларын дьиэтигэр ыытыллар «Триумф мастерства» норуот маастарын күнүн түмүгүнэн кыайыылаахтар уонна призердар быыстапкаларыгар көрдөрүөхтэрэ..
Норуот маастарын күнэ 2012 сыллаахха олохтоммута.
This post was published on 06.03.2026 18:03 18:03