Дьокуускайга олунньу 16 күнүгэр уус-уран гимнастикаҕа Уһук Илин күрэҕэ түмүктэннэ. Бастакы разрядтаах спортсменнар уонна спорт маастарыгар кандидаттар финальнай хамаанданан киирсиилэрин көрдөрдүлэр. Кулун тутар ыйга Санкт-Петербурга ыытыллар Россия күрэхтэһиитигэр Уһук Илини билиһиннэрээччилэр быһаарылыннылар.
Уус-уран гимнастикаҕа Уһук Илин күрэхтэһиитэ Дьокуускайга аан бастаан ыытылынна. Онно Амур уобалаһын, Еврейскэй автономиялаах уобалаһын, Забайкальскай кыраай, Магаданскай уобалас, Приморскай кыраай, Бурятия, Сахалинскай уобалас, Хабаровскай кыраай уонна Саха сирин хамаандаларыттан 12-тэн 15-гэр диэри саастаах 248 спортсменка кыттыыны ылла. Олунньу 12 күнүттэн гимнастар бөлөхтөөх эрчиллиилэри, хамаанданан күрэхтэһиилэри, тус зачеттары аастылар уонна эргимтэлэри, мээчиктэри, лиэнтэлэри уонна булавалары кытта үлэлээтилэр.
Финал түһүмэҕэр күрэхтэһии урукку күннэригэр бастыҥ көрдөрүүлээх аҕыс хамаанда кытынна. Саха сирин сүүмэрдэммит хамаандата түөрт комплект мэтээли ылла: икки кыһыл көмүс уонна икки үрүҥ көмүс.
Уһук Илин күрэхтэһиитин түмүгүнэн 12-13 саастаах кыргыттар хамаандаларын ортолоругар бастакы разряд бырагырааматынан «5 пар булав» дьиссипилиинэҕэ бастаатылар:
1 миэстэ — Саха Сирэ;
2 миэстэ — Приморскай кыраай-1;
3 миэстэ — Приморскай кыраай-2.
5 лиэнтэ дьиссипилиинэтигэр 12-13 саастаах гимнасткалар хамаандалара кыайыылаахтарынан буоллулар:
1 миэстэ — Приморскай кыраай-1;
2 миэстэ — Саха Сирэ;
3 миэстэ — Приморскай кыраай-2.
Эдэрдэр ортолоругар (14-15 саастаахтар) спорт маастарыгар кандидаттар бырагыраамаларынан “5 мээчиккэ” кыайдылар:
1 миэстэ — Приморскай кыраай-1;
2 миэстэ — Сахалин уобалаһа-2;
3 миэстэ — Приморскай кыраай-3.
5 лиэнтэ бырагырааматынан эдэрдэр хамаандаларын ортотугар бастыҥнарынан билиниллибиттэр:
1 миэстэ — Приморскай кыраай-1;
2 миэстэ — Сахалин уобалаһа-1;
3 миэстэ — Бурятия-1.
Владивостоктан «Метеорит» хамаанда «5 лиэнтэ» дьиссипилиинэҕэ кыайда, «5 булаваҕа» иккис, элбэх күрэхтэһиигэ үһүс миэстэни ылла. Кыргыттар уус-уран гимнастиканан 5-тэн 8 саастарыгар диэри дьарыктаналлар.
“Булавалары кытта атырдьах ыйыттан дьарыктаммыппыт, оттон лиэнтэлэри алтынньыга эрчийэн барбыппыт. Эрчиллэргэ бириэмэ аҕыйах этэ. Күрэхтэһиини олус сөбүлээтибит. Манна барыта кэрэтик тэриллибит, саалата, атмосферата үчүгэй. Биһиги Улан Удэҕэ Уһук Илин күрэхтэһиитигэр кыттыбыппыт уонна бириистээх миэстэлэри ылбыппыт. Россия күрэхтэһиитигэр билиҥҥитэ сылдьа иликпит», — диэн кыттааччылар кэпсээтилэр.
Россия күрэхтэһиитигэр путевка хаһаайыннарынан Уһук Илин 14 гимнастката буолла.
Предюниоркалар ортолоругар (12-13 саастаахтарга) бастыҥ гимнастка быһыытынан билиниллиннилэр:
Софья Новикова, Сахалин уобалаһа (многоборьеҕа тус күрэхтэһиигэ 1 миэстэ);
Стефания Павлова, Хабаровскай кыраай (многоборьеҕа тус күрэхтэһиигэ 2 миэстэ);
Василиса Кондакова, Приморскай кыраай (многоборье тус күрэхтэһиитигэр 3 миэстэ);
Александра Третьякова, Забайкальскай кыраай;
Анастасия Гребнева, Саха Сирэ;
Анита Гаража, Саха Сирэ;
Есения Фролова, Хабаровскай кыраай.
Уһук Илини эдэрдэр ортолоругар федеральнай таһымҥа көрдөрүөхтэрэ:
Кира Яблочникова, Сахалин уобалаһа (многоборьеҕа тус күрэхтэһиигэ 1 миэстэ);
Виктория Ляскина, Хабаровскай кыраай (многоборьеҕа тус күрэхтэһиигэ 2 миэстэ);
Елизавета Носова, Бурятия (многоборьеҕа тус күрэхтэһиигэ 3 миэстэ);
Ульяна Болдакова, Хабаровскай кыраай;
Стефания Прут, Сахалин уобалаһа;
Авелина Макарова, Саха Сирэ;
Алина Сивцева, Саха Сирэ.
«Элбэх кэрэ кэскиллээх дьоҕурдаах спортсменнар кыттыыны ыллылар. Күүстээхтэр талылыннылар, Россия күрэхтэһиитигэр Уһук Илини дьоһуннаахтык көрдөрүөхтэрэ диэн эрэнэбин. Бастакы разряд кыттыылаахтарын, спорт маастарыгар хандьыдааттар ортолоругар эмиэ интэриэһинэй киирсии буолан ааста. Финалга эдэрдэр хамаандаларын ортолоругар икки чуолкай лидер баар эбит буоллаҕына, кыралар ортолоругар 24 гимнастка бары кыайыыга дьулуурдаах этилэр. Тренердэр кыттыгастара көстөр. Судьуйалар бэйэлэрин санааларын күүскэ эттилэр. Оҕолорго, судьуйаларга барыларыгар сахалыы бриллианнары бэлэхтээбиттэрин сөҕө көрдүм. Манныгы аан бастаан көрдүм», – диэн күрэхтэһии кылаабынай судьуйата Вероника Мархакшинова (Москва) кэпсээтэ.
