Арктика судаарыстыбаннай агротехнологическай университетыгар кэтэхтэн үөрэххэ Россия икки Геройа киирдилэр. Кинилэр үрдүк үөрэх кыһатыгар туспа квота иһинэн туттарыстылар, диэн Саха сирин үөрэҕин уонна наукатын миниистирин бастакы солбуйааччы Ньургун Павлов өрөспүүбүлүкэ үөрэҕин тэрилтэлэригэр ылыы хампаанньатын түмүгүн туһунан брифиҥҥэ иһитиннэрдэ.
Андрей Григорьев «агроинженерия» хайысхаҕа, Алексей Петров «зоотехния» идэҕэ үөрэниэхтэрэ.
Миниистир бастакы солбуйааччыта этэринэн, быйыл Саха сирин үрдүк үөрэхтэрин бырагыраамаларыгар 43 649 сайабылыанньа киирдэ. Медицинскэй идэлэр, инженернэй-техническэй хайысхалар уонна кэккэ гуманитарнай профиль бастакы кэккэҕэ тураллар.
Үрдүк үөрэх кыһаларыгар бюджет миэстэлэригэр киирии сүрүн түһүмэҕин түмүгүнэн 3000-тан тахса киһи бастакы кууруска ылылынна. Приоритетнай түһүмэххэ киириигэ анал туттарыы суох.
Идэтийбит үөрэх тэрилтэлэригэр сайабылыанньалары ылыы түмүктэннэ: 27 105 абитуриентан 41 801 сайабылыанньа киирдэ, олортон 564 — анал байыаннай дьайыы кыттыылаахтарын дьиэ кэргэттэрин чилиэннэриттэн.
«СВО кыттыылаахтарын дьиэ кэргэттэрин өйөөһүн судаарыстыбаннай бэлиитикэ приоритета буолар. Кинилэртэн хас биирдиилэрэ хаачыстыбалаах үөрэххэ бырааптарын олоххо киллэрэр кыахтаналлара уонна баҕалаах идэлэрин ылаллара биһиэхэ улахан суолталаах», — диэн тоһоҕолоон бэлиэтээтэ Ньургун Павлов.
Саха сирин колледжтарыгар уонна техникумнарыгар доруобуйа харыстабылын, үөрэхтээһин уонна педагогическай наука, сирдээҕи транспорт техниката уонна технологията, экономика уонна салайыы, информатика уонна ааҕар техника, сервис уонна туризм, юриспруденция курдук үөрэх хайысхаларын ордук таллылар.
This post was published on 18.08.2025 17:21 17:21