Россия Геройа Николай Соболев кадрдары бэлэмнээһини сүрүннүүр Саха сирин баһылыгын көмөлөһөөччүтүнэн ананна. Бу туһунан Айсен Николаев олунньу 9 күнүгэр, бэнидиэнньиккэ, бырабыыталыстыба уонна дьаһалта салалтатын кытта планернай мунньахха иһитиннэрдэ. Ол туһунан www.sakha.gov.ru саайт суруйар.
Өрөспүүбүлүкэ салайааччыта ааспыт сыл бүтүүтүгэр судаарыстыбаннай сэбиэт мунньаҕар Россия президенэ Владимир Путин кадр боппуруостарын дойду сайдыытыгар фундаментальнай диэн ааттаабытын бэлиэтээтэ.
«Президент ити быһаччы хас биирдии региоҥҥа уонна хас биирдии салааҕа сыһыаннааҕын тоһоҕолоон бэлиэтээбитэ. Оччолорго кини биһиэхэ, регионнар салайааччыларыгар, уопсайынан дойдуга, кини экономикатыгар кадрдары бэлэмнээһини сүрүннүүргэ регион баһылыктарын биирдиилээн анаммыт көмөлөһөөччүлэрэ дьарыктаналларын туһугар быһаччы эппитэ. Бу дуоһунаска биһиги өрөспүүбүлүкэбитигэр Россия Геройа, икки хорсун быһыы уордьанын, «Хорсунун иһин» мэтээл кавалера Николай Сергеевич Соболев ананыаҕа, кинини бары үчүгэйдик билэҕит. Кини «Геройдар кэмнэрэ» президент үөрэх бырагырааматын иккис түһүмэҕин кыттыылааҕа. Бойобуой уопуттаах, патриотизм сыаннастарын билэр анал байыаннай дьайыы кыттыылаахтара төрөөбүт дойдуларыгар сулууспалааһыннара өрөспүүбүлүкэҕэ саамай эппиэтинэстээх, уустук учаастактарга ирдэнэр. Ону мин куруук этэбин, онон утумнаахтык дьарыктанабыт. Ол иһин Николай Сергеевичка мин көмөлөһөөччүтүм буоларыгар этии киллэрдим. Мин этиибин ылынна. Кини ананарын туһунан ыйаах сотору кэминэн тахсыаҕа», — диэтэ Айсен Николаев.
Регион баһылыгын иһитиннэриитинэн, Николай Соболев үлэтин сүрүн хайысхатынан өрөспүүбүлүкэ экономикатыгар федеральнай, региональнай, муниципальнай былаас уорганнарын, уопсастыбаннай түмсүүлэри, үөрэх тэрилтэлэрин уонна бизнеһи кытта бииргэ үлэлээһиҥҥэ кадрдары бэлэмнээһини сүрүннээһин буолуоҕа. Кини судаарыстыбаннай былаас, олохтоох салайыныы уорганнарыгар кадрдары сүүмэрдээһини уонна туруорсууну тэрийиигэ, анал байыаннай дьайыы кыттыылаахтарын — бэтэрээннэрин судаарыстыбаннай уонна муниципальнай салайыы тиһигэр интеграциялааһын үлэтигэр кыттыыны ылыаҕа.
«Николай Сергеевич уопутун, компетенциятын, талаанын учуоттаан туран, бу хайысхаҕа үлэни саамай үрдүк таһымҥа тэрийэригэр эрэллээхпин», — диэтэ Айсен Николаев.
This post was published on 10.02.2026 10:03 10:03