«Росатом Арктика» муора биир кэлим операторын (ЕМО) быһыытынан Хотугу муора суолунан эрэ буолбакка, Саха сирин өрүстэринэн таһаҕаһы тиэрдиинэн дьарыктаныаҕа. “Якутия24” телеханаал “Актуальное интервью” биэриитин кэмигэр регион гражданскай оборуона дьыалаларыгар уонна нэһилиэнньэ олоҕун-дьаһаҕын куттала суох буолуутун хааччыйыыга миниистирин солбуйааччы Никита Павлов иһитиннэрбитинэн, пилотнай бырайыак быһыытынан 2026 сылга Архангельскайтан Нижнеянскайга, Тиксиигэ, Чокурдаахха уонна да атын арктическай оройуоннар нэһилиэнньэлээх пууннарыгар муоранан 15 тыһ туонна ньиэби тиэрдии былааннанар.
Саха сирин уонна «Росатом Арктика» икки ардыларыгар туһааннаах сөбүлэҥҥэ 2025 сыл ахсынньытыгар илии баттаммыта. Өрүттэр 2028 сыл бүтүөр диэри былааннааһыҥҥа уонна логистикаҕа бииргэ үлэлииргэ дуогабардастылар. «Росатом. Арктика» хампаанньа генеральнай дириэктэрэ, ЕМО кэрискэтин толорор Владимир Панов уонна Саха сирин бырабыыталыстыбатын бэрэссэдээтэлэ Кирилл Бычков илии баттаатылар.
Докумуон хотугу тиэйиигэ сыһыаннаах араас боппуруостары хабар, ол иһигэр логистиканы сүрүннээһин, маршруттары уонна кыраапыгы оптимизациялааһын, тарыыптары тутуһууну хонтуруоллааһын. ЕМО үлэтэ регион былаастарын уонна урбаанньыттарын кытта бииргэ алтыһан, Саха сирин уһук оройуоннарын олохтоохторун тыын суолталаах табаардарынан уонна матырыйаалларынан кэмигэр уонна тохтоло суох хааччыйыаҕа.
Арассыыйа бэрэсидьиэнэ Владимир Путин Арассыыйа бырабыыталыстыбатын чилиэннэрин кытта сүбэ мунньаҕар Үп министиэристибэтигэр, уларыйа турар халлааннаах хотугу тиэйии үбүлээһинин хонтуруоллууругар сорудахтаата.
«Халлаан туруга билигин маннык, сарсын — атын. Туохха эмэ хойутаатахпытына, тириэрдибэтэхпитинэ, кыһалҕа үөскүөҕэ. Онон мин эһигиттэн кэмигэр үбүлээһини кытта сибээстээҕи барытын суһаллык кэтээн көрөргө олус көрдөһөбүн», — диэтэ Владимир Путин.
Санатан эттэххэ, Саха сирин баһылыга Айсен Николаев Судаарыстыбаннай Мунньахха (Ил Түмэн) туһаайыытыгар навигация кэмигэр таһаҕаһы тиэйиигэ кыттыгастаах аҕалааччыларга уонна таһааччыларга иэһи аччатыыга туһуламмыт дьаһаллары бэлиэтээтэ.
This post was published on 29.01.2026 12:11 12:11