Олимпийскай оонньуулар кыайыылааҕа уонна үрүҥ көмүс призера Роман Дмитриев аатыгар норуоттар икки ардыларынааҕы турнир быйыл көрөөччүтэ суох ыытыллар. Регион тэлэбиидэнньэтэ уонна ютуб-ханаал быһа холбонууну оҥоруохтара. Эпидемияны утары бары миэрэлэр тутуһуллаллар. СИА-ҕа спорт миниистирин солбуйааччы Леонид Спиридонов эттэ.
«Роман Дмитриев кэриэһигэр турнир тустуу Холбоһугун уонна Россия спордун министиэристибэтин халандаарыгар киирбит тэрээһин. Күрэхтэһии муус устар 29 — ыам ыйын 1 күннэригэр ыытыллар. Бүгүҥҥү туругунан, алта дойду хамаандата уонна Россия регионнарыттан аҕыс хамаанда кыттара билиннэ. Эпидбалаһыанньанан быйылгы турнир киэҥ далааһына суох ыытыллар», — СИА-ҕа кэпсээтэ Леонид Спиридонов.
Тэрээһин чэрчитинэн, муус устар 29 күнүгэр Роман Дмитриев пааматынньыгар сибэкки ууруохтара, турнир пресс-конференцията ыытыллыаҕа, спортивнай маастарыстыба Үрдүкү оскуолатын экс-дириэктэрэ Александр Игнатьев кэриэһигэр анаммыт «Жизнь, отданная спорту» кинигэ сүрэхтэниэ.
«Икки күн буолар — муус устар 30 күнүгэр бары категорияҕа талар киирсиилэр, финал — ыам ыйын 1 күнүгэр. Саха сирин састаабыгар отучча тустуук баар. Бириис былырыыҥҥы курдук: бастаабыкка — 70 тыһ, иккискэ — 50 тыһ, үһүскэ — 40 тыһ солк. Чемпион тренеригэр — 40 тыһ солк», — диэтэ кини.
Күрэхтэһии ыйааһыннара 57, 61, 65, 70, 74, 79, 86, 97, 125 кг. UWW-тан техническэй делегатынан Тохир Гуламов Узбекистантан ананна.
