Россия үрдүк үөрэх кыһаларыгар омук устудьуоннара уонна аспираннара быйыл күһүнтэн нуучча тылын уонна литературатын салаатыгар улахан ситиһиилэрин иһин уһулуччулаах учуонай-филолог Людмила Вербицкая аатынан истипиэндьийэ ылыахтарын сөп. Бу туһунан уураахха РФ премьер-миниистирэ Михаил Мишустин илии баттаата, диэн дойду бырабыыталыстыбатын пресс-сулууспатыгар иһитиннэрдилэр.
«2026 сыл балаҕан ыйын 1 күнүттэн саҕалаан, ый аайы төлөбүрү 10 устудьуон (курсаан) истэн үөрэхтээһин уонна 10 аспирант (адъюнкт) ылыахтара. Кинилэр кээмэйдэрэ устудьуоннарга (курсааннарга) 15 тыһ.солк. уонна аспираннарга (адъюнктарга) 20 тыһ. солк. буолуоҕа», — диэн этиллэр.
Истипиэндьийэни биир сылга биэриэхтэрэ. Бакалавриат устудьуоннара иккис куурустан, оттон магистраннар бастакы куурустан ылыахтарын сөп.
Төлөбүр кимиэхэ тиксэрин куоҥкурус нөҥүө быһаарыахтара. Хандьыдааттары кинилэр үөрэх тэрилтэлэрин учуонай сэбиэттэрэ киллэриэхтээхтэр. Устудьуоннар үөрэххэ иэстэрэ, эксээмэннэригэр үс сыаната суохх буолуохтаахтар. Өссө научнай ыстатыйалар бааллара, конференцияларга тыл этэллэрэ, чинчийиигэ наҕараадалар эбэтэр граннар ылаллара улахан суолталаах.
Бу харчы омук дьонун нуучча тылыгар, литературатыгар үөрэтэр былааннаах эдэр исписэлиистэргэ көмөлөһүөҕэ.
Людмила Вербицкая — нуучча тылыгар бэрэсидьиэн сүбэтин тэрийиини көҕүлээччилэртэн биирдэстэрэ, бу кэлин нуучча тылын уонна РФ норуоттарын тылларын өйүүр эйгэҕэ судаарыстыбаннай бэлиитикэни олоххо киллэрэр Сэбиэт буолбута.
