Уһук Илин сайдыытыгар бэйэтэ туспа бырагыраамаланна. РФ Бырабыыталыстыбатын бэрэссэдээтэлэ Михаил Мишустин дьаһалынан бигэргэннэ. Сүрүн сыала — регион экономикатын сайдыытын түргэтэтии, демографияны тупсарыы, нэһилиэнньэ көһүүтүн тохтотуу, дьон олоҕун хаачыстыбатын тупсарыы.
Нацбырагыраама президент Владимир Путин сорудаҕынан оҥоһуллубута. «О мерах по социально-экономическому развитию Дальнего Востока» диэн бэс ыйынааҕы ыйаахха Уһук Илиҥҥи региону сайыннарыыга сүрүн тосхолу эппитэ. Дойду салайааччытаи онно бэлиэтээбитинэн, кэлэр түөрт сылга Уһук Илиҥҥи регион сүрүн хайысхаларынан сайдыыта Россия орто көрдөрүүтүттэн ордук тэтимнээхтик барыахтаах.
Михаил Мишустин атырдьах ыйыгар Уһук Илиҥҥи территорияларынан командировкаҕа сылдьан, баар кыһалҕалары көрдө уонна быһаарыылары ылары эттэ. Балаҕан ыйын 23 күнүгэр бырабыыталыстыба мунньаҕар министиэристибэлэргэ уонна биэдэмистибэлэргэ национальнай бырагыраама үлэтин муҥутуур хонтуруолга тутары эттэ.
Бырагырааманы үс түһүмэҕинэн ыытар былааннаахтар: 2020 — 2024 сыллар, 2025 — 2030 сыллар уонна 2031 — 2035 сыллар. Хас биирдии этаабыгар дьаһаллар былааннара бигэргэниэҕэ. Холобур, экономика хайысхатыгар 2035 сылга диэри 450 тыһ саҥа үлэ миэстэтэ таһаарыллыахтаах, ыраах сытар нэһилиэнньэлээх пууннарга авиация олохтонуо (40 аэропорт баар буолуо) уонна интернет холбонуо. Уһук Илин 11 регионугар хас биирдиилэригэр саҥа туристическай кластер тэриллиэ. Социальнай инфраструктура — саҥа оскуолалар, дьыссааттар, балыыһалар, култуура эбийиэктэрэ элбиэхтэрэ.
