«Оскуолаҕа оҕолор аһылыктарын тэрийии бүгүҥҥү күҥҥэ инникилээн тутуллар боппуруос буолар. Сокуоннар уонна араас нуорма докумуоннара ылыллаллар. Биһиги килиимэппит, омукпут, итэҕэлбит уратыларын учуоттуохтаахпыт. Холобур, биһиги экстремальнай килиимэттээх сиргэ олорор буоламмыт олохтоох бородууксуйаны менюга киллэриэхтээхпит — эт, үүт, отон уонна бэйэбит олохтоох оҥорон таһаарааччыларбыт бородууксуйалара баар буолуохтаах күннээҕи аска», — диэтэ РНА СС ФИЦ Саха сиринээҕи научнай киин нутригеномика лабораториятын сэбиэдиссэйэ, тыа хаһаайыстыбатын наукаларын доктора Константин Степанов.
Тосхол сессиятын кэмигэр ылыллыбыт быһаарыылар Үөрэх, Доруобуйа харыстабылын министиэристибэлэрин, наука тэрилтэлэрин, былаас уоргаттарын кытта сөбүлэһиллэн, үлэҕэ киириэхтэрэ. Быһаарыылар оскуола иннинээҕи саастаах уонна оскуола оҕолорун тэрилтэлэригэр куттала суох хаачыстыбалаах аһынан хааччыллыы тэриллиитигэр туһалыахтаах.
