Ил Дархан Айсен Николаев национальнай бырайыактарынан ыыппыт мунньаҕар, үөрэх эйгэтигэр көхтөөх үлэ барбыта бэлиэтэннэ. Ол туһунан бырабыыталыстыба бэрэссэдээтэлин солбуйааччы Сергей Местников эттэ.
«Бу нацбырайыакка сылын аайы көрүллэр суума эбиллэр, онон Саха сиригэр элбэх оскуола тутуллар. Холобур, бу сылга Дьокуускайга 990 миэстэлээх саамай улахан оскуола Прометей микрооройуоҥҥа киириэҕэ. Маны сэргэ Уус Алдан Бороҕонугар оскуола тутуута уонна Дьокуускай оскуолатыгар салҕааһын эбиллиитэ. Саҥа оскуолалары тутуу оҕо иккис сменаҕа үөрэниитин бохсор сыаллаах», — диэтэ Сергей Местников.
Айсен Николаев Россия премьер-миниистирэ Михаил Мишустины кытта көрсүһүүтүн кэннэ, эбии үп көрүлүннэ. «Эбии федеральнай субсидия Таатта улууһун Ытык Күөлүгэр оскуола тутуутугар ананар. Тыа сирин оскуолалара куорат оскуолаларыттан уратыта суох буолуохтаахтар. Бу сылга 110 «Точка роста» үөрэх кииннэрин арыйдыбыт», — диэн эбэн эттэ салайааччы.
