Өрөспүүбүлүкэ 2- с №- дээх балыыһатыгар — суһал медицинскэй көмө киинигэр икки саҥа кислород концентраторын аҕаллылар. Маннык концентратордар тулалыыр салгынтан кислород оҥорон таһаарар кыахтаахтар. Анал медицинскэй тэрил сылы быһа тохтоло суох ыарахан ыарыһахтары кислородунан хааччыйыан сөп. Бу туһунан медецинскэй тэрилтэ кылаабынай бырааһа Иван Иванов иһитиннэрдэ, — диэн СИА кэпсиир.
«Күн бүгүнүгэр диэри балыыһабыт убаҕас кислороду атыылаһан олорбута. Биһиги ол кислороду анал аҕыстыы туонналаа баактарга харайарбыт. Технология үчүгэй, ол эрээри пандемия усулуобуйатыгар кислородтка наадыйыы улаатта, ол иһин биһиги логистикаттан олус тутлуктаахпытын бэлиэтээтибит, ордук саас уонна күһүн эрэйи көрдүбүт. Сороҕор поставщиктары кытта проблемалар эмиэ үөскээччилэр. Онон маннык кутталы сэрэтэр сыалтан, Саха сирин баһылыга Айсен Николаев балыыһалары анал кислороднай станцияларынан хааччыйарга быһаарыы ылыммыта. Бу тэрил көмөтүнэн, биһиги атын дьонтон тутулуктанан бүтэбит, кислороду бэйэбит оҥорон таһаарыахпыт», — диэн Иван Иванов кэпсээтэ.
Кылаабынай быраас бэлиэтээбитинэн, медицинскэй тэрилтэҕэ кислород наадата үрдүк. Балыыһаҕа ыарахан туруктаах дьон сытар отделениетыгар барыта 60- ча ыарыһах баар. Саҥа анал станцияларынан кислороду операционнай уонна уопсай балааталарга биэриэххэ син. Бу дьаһал эпэрээссийэҕэ уонна бүппүтүн кэннэ киһи доруобуйатыгар куттал суох буолуутун хааччыйыаҕа. Кислороднай концентратор күҥҥэ 800 лиитирэ кислород оҥорон таһаарыаҕа. Тэрил аныгыскы ыйга үлэҕэ киирэрэ күүтүллэр. Билигин кини туруорсуутунан үлэлэр саҕаланнылар.
Санатан эттэххэ, Саха сиригэр 10 саҥа кислороднай станциялары аҕалбыттар. Оборудование РБ 1- кы №- дээх национальнай мэдэссиинэ киинигэр, өрөспүүбүлүкэтээҕи 3 №- дээх клиническэй балыыһа уонна Мииринэй куорат киин балыыһатыгар тиксэрдилэр. Ону таһынан Саха Өрөспүүбүлүкэтин клиническэй балыыһатыгар аҕыс станцияны туруораллара күүтүллэр.
