Өрөспүүбүлүкэ үрдүнэн 47 ойуур баһаарын умуруорууга үлэлэһэллэр, 15-һэ бохсулунна. Бу туһунан экология харыстабылын министиэристибэтин пресс-сулууспатыгар сигэнэн, СИА иһитиннэрэр.
Уот 785,80 га сири сиэтэ. Ааспыт сууккаҕа алта уоту умуруордулар: биирдии уоту Мэҥэ-Хаҥаласка, Нерюнгрига, иккилиини — Горнай, Нам улуустарыгар. Ыраах сытар ойуурдарга 6 ойуур баһаарын тохтоттулар. Баһаары умуруорууга 904 киһи, 77 техника үлэлээтэ.
Ыраах сытар 334 312 га иэннээх сиргэ 132 уот көрдүгэнэ баара биллэр. Балары космостан кэтииллэр.
Баһаардар нэһилиэктэргэ, экономика эбийиэктэригэр кутталлара суохтар диэн министиэристибэ пресс-сулууспата иһитиннэрэр.
Экология министиэристибэтэ ойуурга уот көрдүгэнин көрбүт буоллаххытына 8-4112-44-74-76 эбэтэр 8-800-100-94-00 нүөмэрдэргэ эрийэн биллэрэргитигэр көрдөһөр. Ойуурга уоту сэрэхтээхтик туттаргытыгар ыҥырар.
This post was published on 16.07.2020 13:01 13:01