23 От ыйа 23.07
  • 21°
  • $ 87,78
  • 95,76

Өрөспүүбүлүкэ «Бастыҥ преподавателэ» Тааттаҕа үлэлиир

15:34, 27 ноября 2018
Текст:
Читайте нас на
Яндекс Новости
ЯДВ

Таатта үгүс талааннаах дьонноох. Олортон биир чаҕылхай, идэтин толору баһылаабыт, Тааттатааҕы музыкальнай оскуола кыһатын учууталын Александр Иванович Павловы дьоһуннук ааттыыллар. Кини өрөспүүбүлүкэҕэ биир бастыҥ үлэлээх учуутал быһыытынан сыаналанар. 


Быйыл Таатта улууһугар өрөспүүбүлүкэҕэ бастакынан аһыллыбыт музыкальнай оскуолата 60, улуус киэн туттар, ытыктыыр композитора Ф.С. Аргунов төрөөбүтэ 90 сылларын туолаллар.  Оскуолаҕа идэлэрин толору баһылаабыт учууталлар элбэхтэр. Олор истэригэр биир тарбахха баттанар учууталынан, идэтин дэгиттэр баһылаабыт баянист Александр Иванович Павлов буолар. Кини оҕо эрдэҕиттэн баян кылааһыгар үөрэнэн, кэлин идэ оҥостон үөрэммит кыһатыгар 1997 сылтан ыла үлэлиир.

— Баян кылааһын преподавателэ Александр Иванович өрөспүүбүлүкэҕэ «Бастыҥ преподаватель» аатын ылыан ылбыта. Сыллата араас таһымнаах куонкурустарга кини үөрэнээччилэрэ программаларын үрдүк маастарыстыбалаахтык толороллор. Бу саас «Таланты народные» куонкурус чэрчитинэн ыытыллыбыт семинарга «Упражнения для развития беглости игры на баяне: ранний этап обучения» темалаах маастар-кылааһын ыыппыта. Манна кэпсээбит үөрэтэр ньыматын методикатын республика баянист-преподавателлэрэ туһанар кыахтаннылар. Улууспутугар ыытыллар биир да улахан тэрээһиннэр биһиги оскуолабыт учууталларын инструментальнай ансаамбыллара суох ааспат, — диир музыкальнай оскуола директора Д.А. Попова.

Тааттатааҕы народнай театр быйылгы сезоҥҥа туруорбут «Лоокуут уонна Ньургуһун» музыкальнай испиктээхтэригэр Александр Иванович Григорян, Марк Жирков айбыт музыкаларын инструментовкалаан, тыыннаах  доҕуһуолланар кыахтаммыттара.  Таатта мелодистарын ырыаларын нотаҕа түһэрэр киһи — эмиэ кини.

Бу сылларга баян кылааһын оҕолоро үгүс куонкурустарга кыттан кыайыы көтөллөнөн кэлэн учууталларын сырата таах хаалбатын туоһулаатылар. Холобура, быйылгы үбүлүөйдээх сылга үгүстэн аҕыйах холобуру аҕыннахха, баян кылааһыттан элбэх оҕо араас куонкурустарга кытынна. Ол курдук «Саҥа ааттар» куонкуруска: Володя Владимиров 1 степеннээх лауреат, Айсен Бурнашев 3-с степеннээх лауреат; Намҥа буолбут «Байааным алыптаах дорҕооно» куонкуруска Айсен Бурнашев 1-кы степеннээх, Володя Владимиров 2-с степеннээх, Айаал Иванов 2-с степеннээх, Ваня Бакрамов 3-с степеннээх, Федот Павлов 3-с степеннээх лауреат үрдүк аатын сүктүлэр. «Таланты народные» куонкуруска маҥнайгы группаҕа Володя Владимиров 1 степеннээх лауреат, иккис группаҕа Ваня Бакрамов 2-с степеннээх лауреат, Айсен Бурнашев, Айаал Иванов ситиһиилээхтик кытыннылар.

СӨ культуратын үтүөлээх үлэһитэ, мелодист Карл Иванович Христофоров бу курдук кэпсиир:

— Александр Иванович 2017 сылтан Таатта улууһун баянистарын түмсүүтүн салайааччыта буолар. Оҕону сайыннарар оскуолаҕа олус таһаарыылаахтык үлэлиир. Улуус биир кэскиллээх, анал үөрэхтээх специалиһын быһыытынан сыаналыыбын. Мин санаабар, кини улахан ситиһиитинэн народнай инструменнар оркестардарын салайара буолар.  Иллэҥ кэмигэр булт-алт диэн баран муннукка ытаабыт киһи, сорсуннаах булчут. Таатта улууһуттан тахсар мелодистар ырыаларын нотаҕа суруйан улаханнык көмөлөһөр. «Таатта 100 ырыатын» сборнигы суруйууга улахан кылааты киллэрбитэ.

Талааннаах учуутал бэйэтин сэмэйдик билиһиннэрэр. Ол оннугар үөрэтэн-такайан таһаарбыт үөрэнэччилэрин ситиһиилэрин туһунан киэн тутта кэпсиир. Сорох выпускнитара анал үөрэххэ киирбиттэр.

Бастакы выпускнигым Сергей Винокуров, биир сыл миэхэ үөрэнэн салгыы Дьокуускайдааҕы музыкальнай училищены бүтэрбитэ. Петя Щукин туһунан эттэххэ, кини бастакы уустук айымньылары оонньообут үөрэнээччим. Сыллата региональнай, республиканскай, норуоттар икки ардыларынааҕы куонкурустарга кыттан лауреат буолбута. Кини илин эҥэр музыкальнай оскуола баян кылааһын үөрэнээччилэригэр бастакынан промышленнай улуустар, куорат оҕолорун кэннитигэр хааллартаан оскуолатын аатын ааттатан улаханнык үөрдүбүтэ. Оскуоланы бүтэриэр диэри иннин кимиэхэ да биэрбэтэҕэ. Билигин анал үөрэҕин бүтэрэн эрэр. Биир үөрэнээччим Миша Седалищев ситиһиилэрин бэлиэтиэхпин баҕарабын. Кини олус техничнэй, уустук айымньылары оонньообута, норуоттар икки ардыларынааҕы куонкурустарга кыттыбыта.

Оттон Эрик Самыров иккис кылааска үөрэнэ сылдьан бастакы куонкурсугур кыттан бастаабытын үөрэ саныыбын. Онтон ыла куонкурустарга, фестивалларга куруутун ситиһиилээхтик кыттыбыта. Айылҕаттан талааннаах оҕону дьүүллүүр сүбэ куруутун бэлиэтээн музыкальнай үөрэҕин салгыырыгар ыҥыраллара да Эрик атын үөрэххэ киирдэ. Костя Давыдов музыкант буолар күүстээх баҕа санаатын толороору кыра кылаастан дьаныардаахтык кыһаллан дьарыктаммыта. Сүрэхтээх, толоругас буолан үһүс кылаастан саҕалаан оскуоланы бүтэриэр диэри республиканскай улахан куонкурустарга куруутун Гран-При, бастакы миэстэни ылара. Билигин Новосибирскайдааҕы музыкальнай колледжка ситиһиилээхтик үөрэнэр. Эриктаах Костя күүскэ дьарыктанар буоланнар, репертуардара кэҥээн республиканскай «Музыка барыбытыгар» бырайыак чэрчитинэн хаста да сольнай кэнсиэрдэри биэрбиттэрин бэлиэтиэхпин баҕарабын. Билигин эмиэ киэн тутта ааттыыбын Володя Владимировы, Айаал Ивановы, Ваня Бакрамовы уо.д.а. Ханнык баҕарар инструмены баһылааһын ураты уустук. Элбэх үлэттэн, биир да күнү көтүппэккэ, илиини араарбакка эрчийииттэн, бириэмэни харыстаабакка дьарыктан турар. Сүрэх уонна баҕа наада. Улахан оруолу төрөппүт өйдүүрэ, өйүүрэ, хонтуруоллуура ылар. Ханнык баҕарар оҕо бу ирдэбиллэри толордоҕуна музыкант буолар кыахха киирэр, — диир учууталлара.

Ааптар: С. Халгаева

Следите за самым важным и интересным в Telegram-канале и WhatsApp-группе ЯСИА