Арассыыйа тырааныспарка министиэристибэтэ 2024 с. диэри 66 региональнай аэропуортары саҥардарга модернизация уонна магистральнай инфраструктураны хаҥатыы биир кэлим былаанын бырайыагын оҥордо. Онтон 38 – Уһук Илин, ол иһигэр Саха сиринээҕи салгын суолун ситимнэрэ киирдилэр.
Региональнай аэропуортары саҥардыы дойду бэрисидьиэнэ Владимир Путин ыам ыйынааҕы ыйаахтарыгар олоҕуран оҥоһуллуоҕа. Ол боппуруостарын Ил Дархан э.т. Айсен Николаев РФ тырааныспарка миниистирин Евгений Дитриҕы кытта от ыйыгар дьүүллэспиттэрэ.
Арассыыйа үрдүнэн Саха сирэ саамай улахан географиялаах 32 аэропуортаах, 133 сөмөлүөт түһэр былаһааккалаах. Онтон күн бүгүн Алдан, Бүлүү, Мииринэй, Нерюнгри, Полярнай, Талакаан, Тиксии, Чокурдаах уонна Дьокуускай эрэ көтөр аал түһэр-тахсар балаһата кытаанах оҥоһуулаах. Ол иһин өрөспүүбүлүкэ 25 аэропуортарын барыларын саҥардары туруорсар.
СӨ Тырыыныспарка министиэристибэтэ этэринэн, олохтоох аэропуортар 80% эргэрэн турар. Ону таһынан, АН-24 эргэрбит сөмөлүөттэри көтүүттэн устар номнуо уолдьаста.
Быйыл Өлүөхүмэҕэ, Ньурбаҕа, Мииринэйгэ, Черскэйгэ, Эдьигээҥҥэ, Хаандыгаҕа, Үрүҥ Хайаҕа, Үөһээ Бүлүүгэ, Бүлүүгэ, Депутатскайга, Сангаарга, Нерюнгрига, Полярнайга, Уус-Ньараҕа, Маҕаҥҥа уопсайа 15 аэропуорду саҥардыы «Тырыыныспар ситимин сайдыыта» диэн госпрограммаҕа киирдэ. Бырайыакка эбии харчы көрүлүннэҕинэ биирдэ ол үлэтэ саҕаланыахтаах. Бу туһунан СӨ Бырабыыталыстыбатын уонна Ил Дархан э.т. пресс-сулууспата иһитиннэрэр.
Марианна Тыртыкова, «Саха сирэ», edersaas.ru
This post was published on 27.08.2018 15:32 15:32