Тыа хаһаайыстыбатын уонна ас-үөл бэлиитикэтин министиэристибэтин өрөспүүбүлүкэ тыатын хаһаайыстыбатыгар сааскы халаан уутун куттала суох аһарар дьаһалларын былаанын, соруктарын итиэннэ ынах сүөһүнү, сылгыны үрдүк сиргэ таһаарыыга бэлэмниир, эрчийэр дьаһаллары ыытар тустарынан бирикээстэригэр олоҕуран, министиэристибэҕэ халаан уутугар барыахтарын сөптөөх тыа хаһаайыстыбатын эбийиэктэрин испииһэгэ оҥоһуллубута.
Туһааннаах отдел салайааччыта Виталий Никитин салайааччылаах бөлөх Амма, Өлүөхүмэ, Кэбээйи, Нам, Уус Алдан, Чурапчы, Дьааҥы улуустарынан сылдьан, кэлим сэрэтэр үлэни ыытта. Боломуочунайдар ынах сүөһүнү уонна сылгыны быстах кэмҥэ туруорар пууннарга күрүө-хаһаа туругун, аһылык хасааһын сыныйан көрдүлэр итиэннэ үөрэтэр-дьарыктыыр семинардары ыыттылар. Таарыйа өртөөһүн быраабылаларын быһаардылр. Тыа хаһаайыстыбатын кыылын-сүөлүн хайдах страховкалатары уонна айылҕа алдьатыытыттан хоромньуну оһорунууга докумуону сөптөөхтүк толорору көрдөрөн-сүбэлээн биэрдилэр.
Маннык сэрэтэр-үөрэтэр үлэ ыытыллыбыт хас биирдии нэһилиэгэр тыа хаһаайыстыбатын исписэлииһигэр быйыл саҥа бэчээттэммит туһааннаах докумуоннар хомуурунньуктара туттарылынна. Ити курдук б.дь. муус устар 17 күнүгэр диэри 40 нэһилиэнньэлээх пууҥҥа сүөһү-сылгы сааскы халаан кэмигэр туруохтаах 66 пууна көрүллэн, уу кэлэрин көрсөргө бэлэминэн ааҕылынна.
