Саха сиригэр өрөбүллэргэ салгын температурата үрдээһинэ бэлиэтэниэҕэ. Киин улуустарга күнүс -18 уонна -23 кыраадыс буолуоҕа, түүнүн -30 тиийиэҕэ. Ол туһунан ЯСИАҕа УГМС салайааччытын солбуйааччыта — Гидрометкиин начальнига Татьяна Маршалик эттэ.
«Красноярскай кыраайтан кэлбит күүстээх циклон билигин Саха сирин арҕаа өттүгэр дьайар. Ленскэйгэ, Өлүөхүмэҕэ, Алдан, Нерюнгри арҕаа өттүгэр, Мииринэй соҕуруу туһаайыытыгар сылаас күн-дьыл турар. Күнүс 0 — -6 кыраадыс. Ити эрээри өрөспүүбүлүкэ хотугулуу-илинигэр тымныы. Өймөкөөҥҥө -44, Дьааҥыга -48. Верхоянскайга климатическай нуорма -44, ити аата нуорматтан 4 кыраадыһынан кыра», — диэтэ Татьяна Маршалик.
Кини эппитинэн, сэтинньи 22 күнүгэр арҕааҥы циклон хотугулуу-арҕаа оройуоннарга көһүөҕэ, субуотаҕа арҕаа оройуоннарынан салаллан, өрөбүлгэ киин улуустарынан соҕуруу барыаҕа. Онон сылаас күн-дьыл туруга соҕуруу-арҕаа уонна кииҥҥэ бэлиэтэниэҕэ, өрөбүл күн — киин улуустарга.
