Бу өрөбүлтэн «ЛОРП» ПАУо туризм хайысхатыгар саҥа сүүрээни киллэрэри былаанныыр, суруйда Саха сирэ саайт.
Бу туһунан «ЛОРП» ПАУо пассажирдары таһыы уонна туризм сулууспатын салайааччыта Дмитрий Громов бу курдук сырдатта:
— Кулун тутар 22 күнүттэн Орто Дойду зоопаркатыгар туристическай оптуобус саҥа сырыыта олохтонуоҕа. Бу айан үрүҥ эһэ оҕолорун — Вилюйу уонна Янаны кытта көрсүһүүгэ туһуланар. Ол курдук, Жатайтан саҕалаан, өрөспүүбүлүкэ киин куоратын автовокзалын таарыйан, Хаҥалас улууһун киэҥник сураҕырар «Орто Дойду» зоопаркатыгар тиийиэҕэ. Оптуобус аара «Төхтүр-Паарка» хайыһар баазатыгапр уонна «Орто Дойду» туристическай комплекска тохтобул оҥоруоҕа.
Биллэн турар, бу сонун сүүрээн үрүҥ эһэ оҕолорун Вилюйу уонна Янаны кытта ыкса сибээстээх. Колыманаттан уонна Ломоносовтан төрөөбүт игирэлэр улаатан, олоҕу уратытык көрөллөр, олус көхтөөхтөр, кыраҕа да олус үөрүнньэҥнэр, ыалдьыттары бэркэ сөбүлүүллэр.
Аара баран иһэн “Орто Дойду” туристическай аралдьытар комплекска сылдьыахха сөп. Бу тэрилтэ саҥардыллан, билигин дьиэ кэргэнинэн сынньанарга олус табыгастаах буолла. Манна соторутааҕыта дьиэ кэргэн аныгы киинэ аһылынна. Ураты архитектурнай көрүҥүнэн оҥоһуллубут дьиэ ыраахтан харахха быраҕыллар.
Туристары 39 миэстэлээх тупсаҕай «Золотой дракон» туристическай оптуобус “Жатай б.→ Автовокзал → Төхтүр-паарка → «Орто Дойду» туркомплекс → «Орто Дойду» зоопарка” туһаайыынан таһыаҕа.
Көлө көхтөөх айанньыттарга анаан оҥоһуллубут: таһаҕас уурар киэҥ миэстэлэрдээх, сноуборд, хайыһар уо.д.а. тэриллэри ууруохха сөп.
Билиэттэри Дьокуускай к. автовокзалын официальнай саайтыттан https://avtovokzal-yakutsk.ru/ билсэн атыылаһыахха сөп.
This post was published on 20.03.2026 11:03 11:03