Россия президенэ Владимир Путин Хабаровскайга Уһук Илин уокурук предпринимателлэрин кытта көрсүһүүтүгэр, Дьокуускайга Өлүөнэ эбэни туоруур муоста тутуутун суолтатын өйдүүрүн эттэ, суруйар ТАСС.
«Дьокуускайга бу улахан кыһалҕа, элбэх сыл ырытылынна, 10 — 15 сыл буолла», — диэтэ судаарыстыба баһылыга.
Көрсүһүү биир кыттыылааҕа тутууну Путин тус хонтуруолугар ыларыгар эттэ. «Өйдүүбүн, сөп», — диэтэ Путин.
Санаттахха, эрдэ президент дойду бырабыыталыстыбатыгар Өлүөнэ муостатын тутуутун 2028 сылга бүтэрэри эппитэ. Бырайыактыыр-сметалыыр докумуона 2023 сыл балаҕан ыйыгар РФ «Главгосэкспертизатын» ааспыта. Сир учаастага оҥоһуллан, инженернай ситимнэр уларытан тэриллибиттэрэ. Тутууну быйыл саҕалыырга былаанныыллар.
This post was published on 12.01.2024 09:33 09:33