Судаарыстыба баһылыга Владимир Путин бэҕэһээ, тохсунньу 31 күнүгэр, “Новогорскай” үөрэнэр-эрчиллэр кииҥҥэ буолбут олимпиецтары кытта көрсүһүүтүгэр, Пхенчханнааҕы Оонньуулар тула үөскээбит быһыыттан-майгыттан спортсменнары дойду кыайан көмүскээбэтэҕин иһин бырастыы гыналларыгар көрдөстө.
Арассыыйа бэрэсидьиэнэ спорду атын сабыытыйалары, көстүүлэри, бэлиитикэни кытта булкуйалларын ордук ыараханнык ылынарын ыйан туран, маннык быһыыга-майгыга көрдөрүүнү ситиһэр уустугун бэлиэтээтэ.
Олимпиецтарга туһаайан Владимир Путин Арассыыйа спорт ыраас буоларын иһин туруулаһара, туруулаһыаҕа, өйүөҕэ, бу туһунан эһиэхэ, спорду сэҥээрээччилэргэ, ханнык да саарбахтааһын суох буолуохтаах диэтэ. «Эһиэхэ мөлүйүөнүнэн дьон ыалдьаллар, эһиги кыайыыгытыгар эрэнэллэр«, — диэн туран, мөкүнү ыатарбакка, санаабакка, бары өйү-санааны күрэстэһиигэ туһаайарга ыҥырда.
Бэрэсидьиэн салгыы Арассыыйа бэйэтин көтүтүүлэрин, алҕастарын, аныгы спорка тутаах суолларга болҕомтотун ситэ уурбатаҕын билинэрин, ону кытта спорт аан дойдутааҕы тэрилтэлэрэ сорох дойдулар судаарыстыбаннай тэрилтэлэригэр кубулуйбаттарыгар эрэнэрин эттэ. Ону кытта Владимир Путин Олимпиадаттан туоратыллыбыт спортсменнары былаас өйүөҕүн иһитиннэрдэ.
