Таатта улууһугар анал байыаннай дьайыы кыттыылаахтарын уонна кинилэр дьиэ кэргэттэрин чилиэннэрин «Правомобиль. ЧАС КСВО» мобильнай юридическай көмө чэрчитинэн биэдэмистибэлэр икки ардыларынааҕы кэпсэтии буолла. Бу туһунан Саха сирин байыаннайдарын дьиэ кэргэнин Кэмитиэтин салайааччытын солбуйааччы Саргылана Неустроева иһитиннэрдэ.
Мобильнай приемнай чэрчитинэн араас категориялаах боппуруостарга квалификациялаах юридическай көмөнү 70 киһи ылла, кинилэр 100-тэн тахса боппуруос киирдэ.
«Кэпсэтии үксэ анал байыаннай дьайыы кыттыылаахтарын уонна кинилэр дьиэ кэргэттэрин чилиэннэрин өйүүр дьаһалларга, бэлэх дуогабарын оҥорууга, опекуннарга социальнай өйөбүл дьаһалларыгар, үлэ быраабын көмүскээһиҥҥэ, байыаннай сулууспаттан ууратыыга сыһыаннаах», – диэн спикер кэпсээтэ.
«Таатта улууһун КСВО салайааччыта Варвара Максимова көҕүлээһининэн мобильнай биригээдэ олох ыарахан балаһыанньатыгар түбэспит эдэр ыалы кытта көрүстэ. Аҕата АБДь-га сылдьар, ийэтэ үс оҕолоох олорор, иккитэ элбэхтик ыалдьар, үлэлииригэр мэһэйдиир. КСВО ыалы хонтуруолга ылан олорор дьиэ-уот усулуобуйатын чинчийиини уонна тупсарыыны хааччыйыаҕа», — диэн Саха Сирин байыастарын дьиэ кэргэттэрин Кэмитиэтин салайааччытын солбуйааччы Саргылана Неустроева үллэһиннэ.
Саха сирин баһылыга Айсен Николаев өрөспүүбүлүкэ парламеныгар ыыппыт суругар, хомойуох иһин, бойобуой дьайыылар бэтэрээннэрэ уонна кинилэр аймахтара бары бырааптарын, кыахтарын билбэт түгэннэрэ баар буолалларын бэлиэтээтэ.
«Кинилэргэ ханнык өйөбүл дьаһаллар баалларын билбэттэр. Маннык балаһыанньа туоратыллыахтаах. Толору иһитиннэрии, быраап өттүнэн арыаллааһын – оҥоһуллуохтаах дьаһал биир кыра чааһа буолар», – диэн Айсен Николаев ыйда.
This post was published on 04.02.2026 16:01 16:01