Саха дзюдоиһа Полина Иудина дьахталлар ортолоругар Россия чемпионатын боруонса мэтээлин иһин охсуһар быраабы ылла. Күрэхтэһии бастакы күнүгэр үс көрсүһүүгэ биир хотторуулаах, диэн ЯСИА иһитиннэрэр.
Екатеринбург куоракка алтынньы 16 күнүгэр эр дьоҥҥо уонна дьахталларга дзюдоҕа Россия чемпионатын бастакы күнэ саҕаланна. 78 кг ыйааһыҥҥа Саха сирин сүүмэрдэммит хамаандатын лидердэриттэн биирдэстэрэ Полина Иудина кыттар.
Иудина бастакы икки хапсыһыыга иппон оҥордо. Кини Тулаттан Валерия Кожемякинаны кыайда, онтон салгыы Краснодартан Злата Супруженкоттан ордук күүстээҕин көрдөрдө.
Иудина финал аҥаарыгар ааһар мэһэйинэн Россия сүүмэрдэммит хамаандатын лидерэ, Аан дойду чемпионатын боруонса призера Александра Бабинцева Москваттан буолла. Иппоҥҥа хоттордо.
Уоскутар хапсыһыыга Полина Иудина Самараттан Екатерина Фадееваны кыайда. Кыра финалга кини утарсааччыта Челябинскайтан Виктория Лихарева буолуоҕа.
Бу күн Саха сирин хамаандатын дзюдоиһа Магомед Измайлов бастакы көрсүһүүгэ чеченецтан хотторбутун бэлиэтиибит.
This post was published on 16.10.2025 18:02 18:02