Аҕа дойду Улуу сэриитин, үлэ, сибээс бэтэрээнэ Петр Давыдович Скрыбыкин улахан дьиэ кэргэнин ортотугар 100 сааһын бэлиэтээтэ.
Петр Давыдович сэрии кэнниттэн 20 сыл устата Горнай улууһун почтатыгар үлэлээбитэ.
«Эн олоҕуҥ, үлэҥ – норуокка сулуспалааһын бастыҥ холобура. Эн чэпчэкитэ суох олоҕу дьоһуннук олордуҥ: сэриилэспитиҥ, концлааҕыр иэдээнин тулуйбутуҥ, онтон босхолонон буойуннар кэккэлэригэр төннүбүтүҥ. Сэрии кэнниттэн норуот хаһаайыстыбата чөлүгэр түһэригэр эҥкилэ суох, бэриниилээхтик үлэлээбитиҥ», — диэн почта Саха сиринээҕи филиалын дириэктэри солбуйааччыта Күннэй Романова эттэ.
100 сааһын томточчу туолбут бэтэрээҥҥэ Орто Ленатааҕы почтамт аатыттан Махтал суругу уонна харчынан бириэмийэни туттарда.
Петр Давыдович кэргэнин Агафья Жиркованы кытта почтальоннар династияларын саҕалаабыттара. Кинилэр олохторун сыала-соруга оҥостубут үлэлэрин оҕолоро Федор Скрыбыкин уонна Клара Данилова салҕаабыттара. Сиэннэрэ Айталина Винокурова Маҕарас сэлиэнньэтин почтатын салайар.
Скрыбыкин Петр Давыдович Горнай улууһун Бочуоттаах олохтооҕо, Аҕа дойдуну көмүскүүр Улуу сэрии 2 степеннээх уордьанынан, «За победу над Германией в Великой Отечественной войне 1941-1945 годов» мэтээлинэн, о.д.а. наҕараадаларынан бэлиэтэммитэ. Балаҕан ыйыгар Саха сирин баһылыга Егор Борисов уурааҕынан «Үйэ саас» бэлиэни туттардылар.
