Саха сирин ыччат дьыалатыгар уонна социальнай коммуникацияҕа миниистирэ Петр Шамаев Саха сиригэр култуура сыла патриотическай иитиигэ анаммыт дьаһаллары салгыыр аналлааҕын бэлиэтээтэ.
«Көмүскээччи сылын түмүгэ олус үчүгэй. Төрөөбүт дойдубут көмүскээччилэригэр анаммыт тэрээһиннэр олус элбэхтэр, эмиэ биир сыл патриотическай иитии эгидатынан ааста. Ону биһиги тэрээһиннэрбитигэр кыттааччылар ахсааннарынан бэлиэтиибит. Уонна, биллэн турар, билигин кэлбит култуура сыла патриотическай иитии дьаһалларын салҕаныыта буолуо, тоҕо диэтэххэ, төрөөбүт култуураны, төрөөбүт тылы билии- көрүү — ыччаты иитии быстыспат сорҕото», — диэн Шамаев бэлиэтээтэ.
Дьокуускайга Саха тыйаатырыгар историческай өйдөбүнньүк сылын түмүктүүр музыкальнай-литературнай кэнсиэр ыытылынна. Тэрээһин Ленинград блокадатын күнүгэр ананна.
Санатан эттэххэ, ааспыт сылга Россия Аҕа дойду Улуу сэриитигэр Кыайыы 80 сылын бэлиэтээтэ, оттон Саха сирин култууратын тэрилтэлэригэр историческай өйдөбүнньүк сылын биллэрдилэр. 2026 сылы өрөспүүбүлүкэ баһылыга Айсен Николаев култуура сылынан биллэрэн, бары муниципальнай тэриллиилэргэ култуура олоҕун көрүҥүн уонна ис хоһоонун тупсарыыга сорук турар.
